eSefarad Noticias del Mundo Sefaradi
Ver todos los artículos de esta sección
De Salonik a la gimnasia «Herzliya» en Tel Aviv
Kada viernes, desde al enyo 2014, el Sr. Avishay Elbaum, el direktor de la Biblioteka RAMBAM, mos manda a su lista de enbiyo, (402 miembros), su mesaje semanal.
En sus mesajes se topa siempre algun epizodio sovre algun rabino o sus eskritos, kon alguna relasion a la perasha de la semana.
Muchas vezes es interesante de meldar sus reportajas del pasado, ma es muy muy raro (“nadir”, en ebreo, i en turko tambien) de ver
koza sovre algun rabino sefaradi. Si, tres o kuatro vezes me se kombino meldar sovre rabinos de Yemen, Maroko o Irak…
Pero esta semana, fue la primera vez (segun me akodro) topar una letrika ke tiene algun atadijo a los judios del Imperio Otomano.
I ansi eskrive el Sr. Elbaum:
En la perasha de “Mikets”, Yaakov Avinu refuzo separarse de Benymin su ijo, i enbiyarlo kon sus ermanos a Ejipto, komo asi eskrive (en Bereshit 42,38): “I el disho: No desendera mi ijo kon vozotros”.
En realidad, Yaakov tenia muchas razones, siendo ke Benyamin era el uniko ijo de su mujer (Rahel).
Sovre otro kavzo de despartision de ijos del ogar de su famiya, me asaventi por azardo en tratando de meldar la eskritura, i de entender las sirkonstansias de la letra sigiente:
La data de la letra es 1913, i el ke la avia eskrito fue Rabi Yaacov Meir, el ke en akeos anyos era el haham bashi de la komunidad de Salonik.
La letra fue destinada al direktor de la gimnasia “Herzliya” en Tel Aviv, i el kontenido fue una rogativa a resivir a esta eskola un elevo de Salonik:
Karo i estimado senyor,
El mansevo Yosef, ijo de Avraham Burla, elevo del “Talmud Tora haGadol”, kiere terminar sus estudios en Salonik. Aki, te adjunto un sertifikado de parte
del onoravle senyor Y. Epstein, del kual savras sovre las kalidades del mansevo.
El no demanda ningun apoyo, sino resivirlo debaldes en tu eskola.
Te rogo avizarme si sera posivle de kumplir mi demanda, i te rengrasyo de antemano.
Rabbi Yaacov Meir.
En la foto mas abasho (en attachment), aparese el Dr. Epstein, (pedagogo venido de Erets Yisrael,
el direktor de Talmud Tora), kon dos de sus elevos: David Benveniste i Yosef Burla.
Yosef Burla era uno del grupo de mansevos ke fueron mandados a Erets Yisrael, kon la esperansa ke en tornando a Salonik se agregaran en el lavor edukativo de la komunidad.
Una deskripsion sovre el proseso de la organizasion de este grupo, i sus difikultades,
aparese en las memorias ke eskrivio David Benveniste: “La Aliya mia a Erets Yisrael”.
(David mizmo era el nieto del Rav Shemuel Yosef Benveniste, el prezidente del Bet-Din en Salonik, ke avia refuzado a mandar a su nieto de la komunidad).
I ansi eskrivio David en sus memorias:
“”En el anyo 1913, reusho el Dr. Yitzhak Epstein a konvenser a las varyas organizasiones de la
komunidad, a apoyar a unos kuantos elevos del Talmud Tora, a kontinuar sus estudios en la gimnasia “Herzliya” en Tel Aviv.
En el grupo de elevos, avian Moshe Atias, Natan Shalem, Baruh Uziel, Daniel Sayias, Yosef Burla i Nehemia Badrashi. Los tres primeros kumplieron, durante los anyos, postos publikos i sientifikos importantes en Erets Yisrael.
A mi diziluzion, yo no fue inkluido en este grupo, porke desde avia terminado, kon eyos, mis estudios, fue resivido en el Bet Midrash de rabinos en la sivdad.
Komo un desendiente de famiya de rabinos de muchas jenerasiones, fue yo elijido por mi nono a ser el “eredor”, i asistirlo en todas sus tareas.
La opinion de mi nono era ke Salonik, renomada por sus Hahamim i Yeshivot, es bastante kompetente a edukar una jenerasion mueva de hahamim, ke sean kapaz a kumplir todas las nesesidades de las komunidades en la peninsula balkanika, i no ay menester de deshar famiyas, i vagabondar londje, aun ke sea la santa Yerushalayim””.
* * * *
El Sr. Elbaum, el direktor de la Biblioteka RAMBAM, termina su mesaje kon la pregunta) :
Es ke tuvo razon el Rav Shemuel Yosef Benveniste?
——————–
“En el fin de kuento”, David Benveniste insistyo azer Aliya a Erets Yisrael (en 1913!) malgrado el dezeo de su nono, el kual kijo ke se kede en Salonik a estudiar por parvenir ser rabino.
En el anyo 1918, David Benveniste kumplio sus estudios en el Bet-Midrash de maestros en Yerushalayim, i despues servio por dos anyos en el Lejion Judio (en el kuadro de la armada britanika).
Desde el anyo 1920, el lavoro komo maestro en varyas eskolas. Era miembro de la “Hagana”, i gerreo en la gerra de 1948 en Yerushalayim.
David eskrivio muchos artikolos, i tambien livros, sovre la kultura de los judios de Salonik i de los sefaradim en jeneral.
David Benveniste eskrivio tambien livros sovre la jeografia de Erets Yisrael.
El yeva el titolo “Yakir Yerushalayim” (“el kerido de la sivdad”), i en 1982 fue dekorado kon el alto “Premio de Israel” por su grande kontribusion a la edukasion en este pais.
Despues de la Shoa, David Benveniste fue enbiyado unas kuantas vezes kon la mision de salvar archivos de varyas komunidades de Gresia.
El murio en 1993, a la edad de 96.
——————–
Yehuda Hatsvi
Erets Yisrael
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.
