eSefarad Noticias del Mundo Sefaradi
Ver todos los artículos de esta sección
El jaket de Leon
Vos kiero kontar lo ke me paso por la kavesa esta semana, ma ke no vos pareska ke me esto keshando por algo. No.
Muchas vezes, en enkontros kon amigos, avlamos kon nostaljia sovre la vida aki en Erets Yisrael en los anyos ’30 i ’40. En el mez de Nisan, el mez de la primavera en este paiz, aparesiyan al soko. (al merkado), las primisias (trifanda) de las vedruras. Mos akodramos komo kuando, por enshemplo, se preparava alguna salata (tomat, pipino, sevoya freska, prishil), se inchiya la kaza de una meskla de aromas. Komo ninio, esta simfonia tan imensa de aromas, se sintia -me parese- no solo por la nariz sino mezo los oyidos tambien.
Grasias al alto nivel de la teknolojia en Israel, i de la enjenieria agrikola, tenemos agora vedruras TODO el anyo. Tambien las vedruras no son nesesariamente vedres. Agora la zarzavat (vedruras) se izo zurzuvi (en varyas kolores). Indemas, el tiempo de la konservasion de las vedruras en venta, o en muestras kazas, se alargo mucho, i ya no tenemos oy de menester de los kanieles (garde-manger, en franses) ni del tel-dolap.
En el mez de Nisan, el Shabat antes de Pesah se yama en la tradision Judia «Shabat aGadol» («el Shabat el grande»). Una de las razones de este titolo, es por ke en la Aftara ke se melda en este Shabat, topamos el pasuk del profeta Malahi: «Yo enbiyo a vozotros a Eliya el profeta, antes ke venga el dia de Adonay GRANDE i temerozo».
Ma el rekurdo mas tipiko de Shabat aGadol en muchas komunidades sefaraditas, es la tradision de merkar al onor del Shabat el Grande alguna koza mueva o estrenar alguna vestimienta.
El ke konose la estoria de Erets Yisrael en la primera metad del siglo 20, ya save ke la situasion ekonomika en este pais no era tan buena. Ma, entre los sefaradim, afilu el mas prove ke sea, azia todo lo posivle para merkarse alguna koza («sea afilu un par de kalsas») para estrenar en Shabat aGadol.
Oy, en Yisrael, grasias al Dio, la situasyon ekonomika en jeneral esta mas solida i dinamika ke de otros paises en Evropa. La mayoria de la populasion esta en una pozision de merkarse en kada nada alguna ropa mueva, no solamente un par de kalsas, no solamente al enkontro del Shabat aGadol.
Komo ke vos diga?, lo ke pasa es, ke en el viernes pasado me olvidi de merkarme al enkontro del Shaba aGadol, alguna koza para estrenar.
Kreendome, amigos; el sentimiento ke tengo en kontandovos este kavzo personal, no es de ninguna satisfaksion. Al kontrario. Me tomi desplazer i me siento triste en realizando komo mos estamos olvidando kon el tiempo las kostumbres de muestros padres sefaradim.
Para trokar de umor, vos kontare agora una koza en atadijo kon el Shabat aGadol i Pesah.
Lo ke vos esto kontando paso antes muchos anyos en la komunidad judia en Yerushalayim, en el tiempo del dominio otomano. Kiere dizir, mucho antes de la gerra grande de 1917.
Vos do estos datos istorikos, porke en akeos tiempos, los judios de Yerushalayim (afilu los Ashkenazim!) avlavan judeoespanyol. La lengua de los sefaradim era rika i fluente, porke eyos vinieron de todas partes del imperio otomano (Turkiya, Salonik, Monastir i Bulgaria), ansi ke uzavan a vezes varyos o diferentes biervos uno del otro. Sierto, ke los biervos sinonimos dan bivez a la lengua.
Por enshemplo, el kuento de oy, yo ya lo avia eskuchado tres diferentes vezes. Un buen judio me lo konto, diziendome ke se tratava de un jaket (o jaketa) ke se vendio al onor del Shabat aGadol, (en el kual se uza, segun una kostumbre antigua, a estrenar vestiminta).
En otra okazion lo sinti este kuento de boka de otra vizina, avlando sovre la «sultuka», i en la tresera vez, kreendome o no, me kontaron la mizma istoria, uzando la palavra «sakaki».
Kurto lo azeremos Agora. Hanino, uno de los lavoradores en el merkado de la sivdad, se topo en estrecho, dos tres dias antes del Shabat aGadol, porke no teniya bastante paras para merkarse un jaket muevo. Despues de muchas ezitasiones, entro a la butika de Leon su konosido, kon el achake de merkar un poko de pepitas o kirikikes (fistokes, kakuetes). Avlando por aki por ayi, le konto Hanino a Leon ke tiene de menester de un jaket, ma no tiene bastante dinero para merkarse uno.
Leon le propozo de venderlo el jaket suyo.
– «Este jaket ermozo», disho Leon «lo merki el anyo pasado para Shabat aGadol, por 100 liras. Entonses te lo vendo agora por solamente 50 liras. Beraha i salud ke te se aga».
Alegre i kontente, aksepto Hanino a esta propozision, korrio en kaza, kito las 50 liras ke avia guadrado basho de una fronia en el dolap (armario), i merko de mano de Leon su jaketa. Este «komersio» kontinuo komo un ritual algunos sinko o sesh anyos.
Un dia de viernes del Shabat aGadol, torno Hanino kon el jaket uzado ke merko komo su uzo de su konosido Leon; una vez mas por solamente 50 liras. Mizurandose el jaket, disho Hanino a su mujer:
– «Bendicho sea Leon, ke me vende su jaket kada anyo por 50 liras».
– «Bovo arrastado i desmazalado!!!» grito la mujer «Ya ay sesh anyos ke Musyu Leon se viste una sultuka mueva mueva kada anyo, i en realidad le kosta presizamente no mas de 50 liras. I tu, Hanino dezmazalado i bovo, te merkas kon el mizmo presio un jaket ke ya fue uzado una anyada entera !!»
Hanino se kedo kayado, i despues murmureo: – «Bueno, bueno; tienes razon».
Ma la mujer kontinuo a gritarlo: «Sos dezmazalado, sos el vise-prezidente de los desmazalados de todo el mundo»!
Hanino trato de kalmarla kon un aire de shaka, i le disho: – «Vise-prezidente de los desmazalados? i porke no el prezidente»?
-«Porke?!» esklamo la mujer «Por ke sos un desmazalado!!!»
Yehuda Hatsvi
Erets Yisrael
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.
