eSefarad Noticias del Mundo Sefaradi
Ver todos los artículos de esta sección
Baraber kon berberes
«baraber» en judeoespanyol derive de la palavra turka «beraber» ke sinyifika «djuntos».
Tengo algunas tres kozas de kontarvos sovre berberes. Las tres, son rekuerdos desde mi chikez i despues. Dunke, vos kontare los eventos en un orden kronolojiko.
En mi chikez, (ayinda en los anyos ’30), tratando de eksplikarme el termino «paradokso», me konto mi madre un kuenteziko:
Fue esto en el anyo 1928 o 1929. Yosef Stalin el diktador de Rusia anunsio su plano ekonomiko. Entre otros proyektos suyos, el ordeno a fraguar en el norte del pais un modelo de kazal ke se mantenga, a lo tanto posivle, en una ekonomia autarkika.
Se arrekojeron i se instalaron aya 100 pares rezin kazados, kada ombre de otro ofisyo; ansi ke en este kazal avia un fierrero, un kunduryero, un berber, un panadero, etc.
En el primer aniversario de este kazal, vinyeron delegados del governo a ver a kuanto reusho este proyekto. Entre varyas estatistikas ke izieron en el kazal salyo ke 50% de los ombres sivdadinos se arrapavan la barva ande el berber. Ma los otros 50% de los ombres del kazal se arrapavan la barva en kaza.
El paradokso fue: komo ay de notarlo al berber del kazal. Es ke se arrapava en kaza o ande el berber?
Si es por mi, yo uzava kaminar entre los tres o kuatro berberes ke konosia en Tel Aviv, averiguar ke no ay algun kliente asentado, i asentarme yo en el fotolio «libre» del akel berber.
En 1946 empesaron yegar a Erets Yisrael los «maapilim» (los imigrantes ilegales por las leyes drakonianas del governo mandatorio Britaniko). Yo avlo aki en partikolar por los mansevos selaniklis, reskapados de la Shoa.
En el kuartier ande moravamos (Giv’at Moshe en el sud de Tel Aviv), se montaron tiendas grandes (chadires) para albergar/alojar a los refujiados. Ayi se arrekojian tambien muchos abitantes del kuartier, interesados a saver de boka de akeyos mansevikos sovre sovrinos o amigos ke avian deshado en Salonik (en los anyos 1931-1939). Es ke salvo alguno de la katastrofa en Evropa?
Komida no mankava a los «maapilim» ke en los chadires. Mujeres jenerozas kudyavan a traerles «komer de kaza» al uzo de Salonik.
Muchas mosas del kuartier toparon kada una su mazal en akeyos dias de 1946. Avagar avagar, kon el tiempo, kada uno de los mansevos se topo algun lavoro en Tel Aviv, kazarse, i fraguar su nido.
Uno de eyos, lo yamaremos aki Leon, reusho a alkilar una «berbearia», i empeso a lavorar en su ofisio de siempre, berber. El fato ke en akel tiempo no savia Leon avlar en ebreo no fue un gran impedimiento. Todos sus klientes avlavan en espanyol («spanyolit»), o afilu en grego. Kon los klientes Askenazis, ya savia Leon platikar un poko en yiddish o en alman (ke malorozamente avia ambezado en el kampo de konsentrasion, en Auschwitz).
Leon vijitava, de vez en kuando, la kehila de mi padre; ansi, ke kuando entri yo ande Leon el berber a arraparme, el me konosio de vista komo el ijo de «Aroniko» el hazan, i me empeso a kontar sus pasadias en el «lager».
En el «lager» de Auschwitz, Leon lavorava komo berber. Segun me avia kontado, akontesio un dia, ke Heinrich Himmler, el kapo de la S.S., vijito en Auschwitz kon otros mas ofisieres del Gestapo. A la maniana, antes de partir a Berlin, entro Himmler en el lugariko onde lavorava Leon, i demando ke lo arrape la barva.
– «Te apersives, Yudeko, en ke situasion me topava yo, Leon, kon la navaja en la mano, i arrapando la barva de akel megalo (grande) kriminal?? Tenia ganas de pasar la navaja en un movimiento brusko sovre la garganta del maldito Himmler.
– «I deke no lo izites!?» eksklami yo.
– «E, tres soldados almanes estavan ayi, preparados i prontos, kon las pistolas de Schmeiser en la mano. La vida es dulse, no saves?»
Sali del atelye de Leon kon una grande desepsion, i kon un «nyudo» de tristeza en el korason.
Si; bien me vino al tino la dicha de muestros savios:
«…i no djuzges a tu haver (kompaniero) asta ke ayeges a su lugar».
Ma, kon todo el devido respekto a la lojika, mis sentimientos no me desharon, en akea edad, a englutir i espedir el dicho de «la vida es dulse».
De akel dia, no entri mas a arraparme ande Leon.
Paso mas de un mez de akel evento.
– «Ya pareses un papaz» me disho mi madre, «vate a arrapar!»
«Lo dicho – echo».
El primer berber ke topi vakante, fue el berber buharali, yamado Shmueli, en la kaye de Lilienblum. Sin esperar, me asenti en el «fotolio», i Shmueli (mientras me embolvio kon la «pelerina»), me disho:
– «Saves, de mi eksperiensia de berber, yo konosko mijor a mis klientes en mirando a su peskueso. Me parese ke ya te vide aki en algun dia.»
– «Si». le respondi en kurto, i Shmueli empeso arraparme.
Despues de unos kuantos minutos, me disho Shmueli: – «Te plaze konversar mientras te arrapo?»
En akeos dias leshanos, al kontrario de muestra epoka moderna, la djente en el pais bien te entendian si sitavas algun pasuk o alguna epigrama. Dunke, (mostrandome un poko «savido»), me atrevi a dizirle:
– …»Yo no fayi (no topi) al kuerpo mijor, salvo el kayar».
– «Si.» respondio Shmueli «fue este Rabi Shimeon ben Gamliel. No?»
A traves del espejo, Shmueli ya vido mi djesto de kavesa i kon una sonriza livyana. Shmueli fue mi berber preferido por mas de 60 anyos, asta ke mi mujer i yo pasimos a bivir en otra sivdad en Erets Yisrael.
Yehuda Hatsvi
Erets Yisrael
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.
