eSefarad Noticias del Mundo Sefaradi
Ver todos los artículos de esta sección
Animales en la Biblia (2)
Una dicha muy popular mos dize ke «el perro es el mijor amigo de Benadam». Ma, en la Biblia, se avla por el perro en jeneral, kon un tono de despresio.
En el livro de Iyov (30, 1), dize el povereto Iyov: «I agora se riyen de mi los mas djovenos, ke yo en dias…a sus padres, yo desdenyava de poner kon los perros de mis ovejas».
En los primeros kapitolos del livro de Shemot (Exodo) mos kontan anchamente sovre los grandes milagros ke okurieron antes, i durante, la salidura de Ayifto. Ma tambien uvo un otro nes, aunke «chiko», ke poko avlamos sovre este milagro.
Komo lo savemos, perros uzan a ladrar, i ansi advertir del kualker peligro. Ma, en la noche en la kual feryo el Dio a los bohores (primojenitos) de Ayifto (Ejipto), los perros en todo el pais, no ladraron, ni kitaron boz de la boka, en akea noche terrivle (Shemot 11,7).
Ayinda en el livro de Shemot (en el ultimo pasuk del kapitolo 22) meldamos uno de los mandamientos: «karne arrevatada (trefa) en el kampo no komash; a los perros la echaresh».
Ay un «derush» ke mos kere dizir ke esta es la paga ke damos a los perros, «desendientes» de los perros de Ayifto, por kedarsen kayados…
Entre los sefaradim avia (o talvez ayinda egziste) un respekto grande a las komidas en jeneral (i al pan en partikolar). En kavzos, kuando se avia de echar aporey algun komer bozeado, dizian muestras madres: «El Dio ke no mo los de a dezear, ma ya no vale ni para echar a los perros».
En el livro de Shmuel A (17, 43), el barragan Filisteo, Golyat, lo menospresio a David, muestro eroe, ke vino «armado» kon su palo i algunas kuantas piedrizikas del aroyo. I ansi disho el Filisteo: «So yo perro ke vienes a mi kon palos?!»
Este epizodo me izo akodrar de la dicha muestra sovre algun ombre deskuydado: «Topo kazal sin perro, kamino sin palo»
En otro kapitolo en Shmuel A (kapitolos 23 i 24), meldamos por el Rey Shaul i sus ombres ke rodeavan a David i a su djente para kaptivarlos. I na lo ke disho David al rey Shaul:en kapitolo 24,14) «Detras de kien persiges? detras de un perro muerto? Detras de una pulga?»
Kon estas palavras tan umildes (ipokritas, si me demandash a mi) lo konvensio David al rey Shaul de no persigirlo mas.
Terminare mis sitasiones de la Biblia kon las palavras de Kohelet (9,6), ke son komo un imno a la vida: «Mijor es perro bivo ke leon muerto».
En mi chikez me se kombino meldar un livro de Jak London (naturalmente, traduizido al ebreo). En este livro, «white Fang» («Kolmio/diente blanko»), el autor mos konta kon mucha admirasion a este animal, la vida de un perro, su buen karakter i su fidelidad.
En muestra epoka, el perro esta en el servisio del ombre en muchos kampos de la vida umana: desde gia para los siegos asta varyos rolos en la polisia i en la armada, i komo buen kompaniero de amistad para chikos komo grandes.
El orijin del perro preistoriko es del lovo, i el lovo fue domestikado antes ya 14000 anyos, Komo fue ke un animal salvaje komo el lovo parvino ser un animal domestikado? Me apoyo aki sovre la dicha sefaradita: «La ambre traye al benadam a la puerta de su enemigo». Ansi, me imajino, ke los lovos salvajes tambien, empesaron, por kavza de la ambre, aserkarsen a las moradas de la djente. Kon el tiempo, i por modo de interes mutual, se ataron el benadam kon el lovo (perro) kon sentimientos de amistad.
Ultimamente avia meldado en un semanal, ke en 2011, (en la nieve masiva de Saha-Yakuta, en el norte-oriente leshano de Rusia), fueron fayados dos kadavres de kachorros de perro; datados, al pareser, de antes 12400 anyos. Estos dos perrikos, son konosidos agora komo «los perros de Tumat» (al nombre de un kazal serka ande fueron deskuvridos). En estos dias empesaran investigadores komo paleontologos i biologos, azer analizas mezo la autopsia de estos perrikos, i tal vez ambezar mas sovre el «linaje» de los perros.
Mazal de perro!
Yehuda Hatsvi
Erets Yisrael
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.
