eSefarad Noticias del Mundo Sefaradi
Ver todos los artículos de esta sección
Animales en la Biblia (1)
En mis enkontros kon djovenos de los Kibbutzim, me do kuenta ke sus impresion sovre la Biblia es yerrada. La Biblia, segun eyos, kontiene solamente mandamientos del Dio, i rituales de la relijion…
Ma, NO! La Biblia es una parte importante de la estoria de muestro puevlo, kontiene una literatura interesante, i poezia sublime, i indemas avla de muchos temas de todo lo ke pasa en «la tierra i su inchimiento» (Tehilim 24,2).
Este «inchimiento» inkluye, naturalmente, i animales. Dunke avlaremos un poko sovre eyos, i empeso (porke no?) kon la kavra i su krio, el kavrito (ke en diminutivo es «kavritiko»).
En la Haggada de Pesah mos kontan por «un kavritiko ke lo merko mi padre por dos «aspros» por dos «levanim». Ma, no entiendo porke, en varyas edisiones fue imprimido «kavretiko» en lugar del korrekto kavritiko.
La kavra es una bestia domestikada desde el prinsipio de la estoria. Muestros antepasados, empesando de Avraham, Yitzhak i Yaakov, eran chobanes (pastores del ganado). I es kuryozo ke asta oy tenemos en muestra lingua la palavra «ganado» para deskrivir los revanyos de kavras i ovejas, ma «ganado» sinyifika tambien el salario, o los revenidos en jeneral.
Para resivir la bendision de su padre Yitzhak, le trusho su ijo Yaakov una komida buena echa de karne de dos kavritikos. (Bereshit 27).
Karne de kavras, ovejas i vakas era el komer abitual de muestros padres. Dunke, me aze pensar ke ansi fue ke las ofrendas i alsasiones al Dio se azian tambien kon talas beemot (bestias).
En el livro de Shoftim (Djuezes, kapitolo 6) mos kontan por Gideon ke se le aparesio un andjel, i lo ordeno a levantarse komo el lider del puevlo. Gideon (sin saver ayinda ke fue este un andjelo de los sielos), le aparejo al «musafir», un kavrito, i sensenyas (Matsot), i tambien kaldo (supa).
Igualmente akontesio (Djuezes 13) kon Manoah i su mujer kuando vino un andjel a anunsiarles ke serkamente van a tener un ijo (ke bien lo konosemos oy komo Shimshon el Barragan).
En el livro de Shemuel A (kapitolo 16) meldamos por Yishai ke enbiyo por mano de David, su ijo, un regalo al rey Shaul: pan, i un odre de vino, i un kavrito de las kavras.
La kavra no es un animal «delikado». Al kontrario de la vaka, la kavra se akontenta en poko kuydo, i da mucha leche. Ya savesh por seguro el refran sefaradi: «Ambezada esta la kavra a dormir al sereno»
Muestros ermanos Ashkenazim uzavan a yamarla kon el sovrenombre «la vaka de los proves». I en realidad, judios en los kazales de Yemen i de Evropa del Este uzavan a tener al menos una kavra en sus kurtijos para abasteser leche a la famiya.
La leche de la kavra es dulsika, i rika en minerales komo fierro, kalsium, magnesium; vale para enforteser los guesos i para los ke sufren de anemia (el hormon PTH ke kontiene esta leche kontrola bien el nivel del kalsium en el puerpo umano). Al pareser ke la leche de la kavra es la mas serkana en su kompozision a la leche materna. La manteka de esta leche no es tan preferida komo la leche de vaka, ma, los kezos echos kon leche de kavras son alavados.
Kavras (i ovejas tambien) kavzan mucho danyo a los arbustos i plantasiones, porke uzan arrimarsen sovre eyos por komer las ojas. En el Talmud (Bava Kama 79) ordenaron muestros Hahamim de no apasentar los revanyos sino en boskes i prados/pastos leshanos.
Aun ke la lana de las ovejas es mas rika i mas renomada de la lana de kavra, ay un tipo de kavras, «kavras de Angora», (aktualmente Ankara), ke de sus lana se fabrika el teshido (textil) de «Mohair». En los tiempos del Imperio Otomano, fue Turkiya la ke obteniya el derecho exklusivo de fabrikar las telas de Mohair.
En la rejion de Cashmir (entre India i Pakistan) biven kavras tipikas, ke de sus lana se azen los teshidos karos, yamados al nombre de Cashmir.
Yehuda Hatsvi
Erets Yisrael
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.
