LA AMOR PEDRIDA por Nissim Ashkenazi

Karos todos

Ya se save ke la memoria, mos da akodrar de vez en kuando, de evenimientos en el pasado, los buenos i los malos, no puedemos kontrolar el meoyo, lo ke suve, suve. El tiempo de la manseves, era una maravia, espesialmente en los anyos ke mos entrimos al mundo de El i Eya…

Eramos un grupo de mansevos i mansevikas del kartie. Mos enkontravamos, avlavamos, baylavamos, kumiamos i mos enamorimos en la primera vez. Era periodo de koryosidad i ambezo, ke mos yevaron en los kaminos de la vida.

Kada uno kon su destino. Uno kon reushida, otro manko, i en vezes kon pena. Uno de los mansevikos era Moni, mansevo ermozo, altiko, rezio, los kaveyos penyados atras, asigun Elvis, kon brilantina, facha un poko kuhi, i los ojos… un poko aserados i briyando, un poko misteriozo. siempre vistido a la moda, i siempre el ganador de la atansion de las mansevikas.

Estos anyos eran la atelie onde se fraguo muestro karakter. Mos engrandesimos i mos ayegimos a tener muestros ijos i ijas. Moni era de famiya ke vino de Salonik, kon respekto i onor, i no savemos komo salio Moni kon karakter diferente de los otros mansevos del grupo.

Moni era adelantado mas de los otros, pensava mucho de ir afuera del paes, alkansar mas, i korrer adelantre.

En pleitijikos kon otros grupos, vimos ke Moni tiene krualidad, i kavzo feridas en kien ke se metio enfrente de el. Antes de la manseves djugavamos chilikas en la kaledja Hashomer en Haifa. Moni djugava una maravia (era rezio) i todo el vijindado, miravan komo djugavan los ijikos. Una ijika ke se yama Esti, pasava de aya, Moni le dava un bonboniko, esto la emosiono mucho, i de la chikes le veniyan penserios dulses.

Una vez ke estuvo Esti kon amigas en la mar (hof Hakarmel), enadando, ensupito vino una onda rezia i las abolto adientro de la agua, todas salieron, i Esti no. Moni ke estava al deredor, korrio i salto para salvar a Esti. La fayo ezmayada. El ekipo de emerjensiya los kito a Moni i a Esti i los salvaron kon aksiones medikales.

Moni i esti salieron del hospital, i se izieron el kuple el mas famozo del kartie. Esti era henozika, kon una dulsura en su kara, siempre kon sonriza i buena de korason, era un poko bashika i un poko yenika, todos la kieriyan bien. En saliendo, todos los miravan, i veyan su kara tan oroza.

La famiya de Esti eran dezasperados de esta relasion kon Moni, i pensaron ke no va turar. De un lado, la amor de Esti, pura, i kon todo el korason i alma, i de otro lado, Moni kon ojos grandes ke kiere englutiar el mundo entero.

Esti vido todo esto, ama su amor era mas fuerte de todo. Paso tiempo i empesaron los sinyales. Esti vido a Moni abrasando otra mansevika i despues, Moni salio a la Almania por un anyo i Esti aspero, salio otro un anyo, i esti aspero. Moni veniya por vakansa de un mez i se atornava a la Almania. Las relasiones entre Esti i Moni se rumpieron.

Esto le kavzo danyo a la alma de Esti. la sonriza se esparisio de su kara, se aflako, i se entro en una melanholia preta. Sin tener fuersa de salir de esta situasion. Mozotros, los amigos, fizimos esforsos para saportarla, ama, sin reushida.

Esti fue ospitalizada en un senatoriom mediko para enreziarla i liberarla de esta eskuridad. Dos anyos pasaron, i Esti ya salio, i empeso su vida de muevo. Muchos anyos no la vimos. Un diya me yamaron a una kaza ke se les korto la elektrisidad. En avriendo la puerta, la konosi.

Esti, griti, komo estas? te esparesites! aki esto disho Esti, en boz kalma, esto kazada i tengo dos ijas. El pasado lo deshi de atras.

Esti ya desho la vida buena (ke no era buena para eya). Moni, dizen ke era dirijor de bordeles en la alemania, i ya no viene mas.

kon amista.