KUENTOS MODERNOS DE DJOHA VII por el Dr. Selim Salti

INTELIJENSYA

Merkada mostrando a su marido Djoha sus 2 kreaturas le dize:” Mira komo son intelijentes, son komo mi, de mi tomaron…” Djoha no reziste i le responde: “ Por mo de esto mi tino esta en su lugar.”

***

LA VALOR

Djoha i Merkada siempre se peleyavan, un dia en kaminando en la kaye kontinuan a peleyarse. Djoha se inyerva i le dize:” sos una mujer ke no vale ni un grosh.” Eya le responde:” Es tu ke no vales un grosh.” Enriva de esto Djoha le da a entender ke esta pronto a provar ke eya no vale un grosh. Djoha se esta al bodre del kamino i aresta un taksi i demanda al shofer a kuanto lo yeva a Batyam? El shofer le responde: “ sienivente shekeles.” Djoha :” Bueno si esta damma esta kon mi kuanto demandas?” El shofer responde: “ La mizma koza sienivente shekeles.” Djoha se abolta verso Merkada i le dize” vites ke no vales nada mizmo un grosh!!”

***

EL JENERAL

Djoha i sus amigos salieron en permisyon del askerlik i en kaminando en la kaye ven un kamyon markado Jeneral Motors. Djoha se aresta i le da un largo saludo militar. Los amigos le preguntan deke saludas al kamyon? Djoha responde:” Komo no vesh esta eskrito Jeneral!!!”

***

AVAS

Djoha fue invitado a una konferensia de agrikultura. Los espesialistos ke vinieron de munchos payizes kontaron sovre las investigasyones i las esperyensas ke izyeron en sus lavoros. A esta okazyon le preguntan a Djoha, el kualo izo? Sovre esto Djoha responde:” Kon mi amigo Bohor dechizimos ke vamos azer ashlama a la fasulya en metyendole una triandafila.” Los espesialistos se enkantaron i se demandaron por ke? Djoha les disho: “ Ansi kuano mos pedamos va goler la roza!!”

***

LE KAYO LA BOKA

Djoha renkontro en la kaye Hertzl a un viejo amigo ke le konta ke se merko una villa maraviyoza, i le dize:” Si la ves te kaye la boka de la ermuzura.” Sovre esto Djoha le responde: “Atyo muy bien se la amostraremos a mi es.huegra!.”

Fuente: BÜLTEN de los turkanos de Israel – turkisrael.org.il