KUENTOS MODERNOS DE DJOHA V por el Dr. Selim Salti

EN PUNTO DE MUERTE

Djoha estava para murir echado en la kama. La yama a su mujer Merkada i le dize: “ Presiada, te va rogar vístete el mijor fostan ke tienes, penyate, enjoyate, metete el parfum ke me gusta i ven asentate al lado de mi.” La mujer enkantada le pregunta: “ Djoha komo de demandas tienes! En el estado onde estas yo me va ermozear, para ken? “ “ Djustamente “ le responde Djoha, kuando el guerko va vinir puede ser ke se namora de ti i al lugar de tomarme a mi te toma a ti!

EL REY MALO

Djoha un dia estava asentado a dos pasos del rey el mas malo, el mas sanginaryo de su tiempo. El rey lo avia yamado por ke avia sentido el saverisyo de Djoha. El rey le dize: “ Dime, Djoha ke diferensya ay entre ti i un azno?” Djoha se pensa i le responde: “ No mas ke de dos pasos.”

MI PERRO NO ES AZNO

Djoha en kaminando por una de las kalejas en Batyam renkontra a una de sus viejas konosensias narsisika ke kaminava kon su perro. Djoha no tenia por el dinguna sempatia. Mira al perro i dize: “ Ande te estas yevando a este azno?” Su konosido inyervado le responde : “ Komo pode ser Djoha? Este es mi perro, no es azno, de ande estas kitando ke es azno? “ Djoha le responde: “ Siente, no es ati ke te esto avlando, si no ke a tu perro!.”

DOS SUEGRAS

Djoha i Merkada eran kazados dezde munchos anyos . Una demanyanada komo las otras, Merkada kon su demandadero ke no eskapa, le pregunta a su kerido Djoha i dize: “ Dime porke tu no keres bien a mi madre? “ Djoha kualo ke le responda? Una ves ke le paso el enkanto le dize: “ Kerida yo kero bien a mi e.shuegra muncho mas de lo ke keres bien tu a tu e.shuegra!!”

PAPELIKO

Djoha kon su muevo otomobil se estava indo kon su mujerika Merkada a Hayfa. En kamino dos i una kitava de su aldikera un papeliko lo mirava i despues lo metiya atras. Merkada le pregunta: “ Kualo estas mirando en akel papeliko? “ Djoha le responde: “ Esta eskrito a la derecha es el gaz i a su siedra el freno!!”

Selim Salti –2021–

Fuente: BÜLTEN de los turkanos de Israel – turkisrael.org.il