eSefarad Noticias del Mundo Sefaradi
Estos son uatro kuentizikos / memorias / istorias de famiya ke avia eskrito antes de unos kuantos anyos i ke los tengo publikado en Aki Yerushalayim #102-103. Adjusto komo bonus otruno ke eskrivi despues, i bien kave kon los kuatro.
KUATRO ESTAMBOLLIKOS
Aldo Sevi
Publikado en Aki Yerushalayim #102-103
ESTAMBOL, ENVERANO DE 1974
-Aldiko, vistete! Ya ‘sta kaji 4. Kale ir ande la tant Maryet.
-No kero.
-Deké no keres?
-M’espanto de eya.
-T’espantes?
-Parese una brusha.
-Deké dizes esto?
-Es media loka i muy feya i su kaza gole.
-No te adjideas un poko de eya?
-Eya no adjidea de mi. Me va dar una chikolata vieja ke tiene en su almario por dos anyos.
-No te puedo deshar akí solo.
-Deshame ande la madam Ojení.
-La keres bien a madam Ojení? Ke sepas ke eya no es una persona buena.
-Eya es ermoza i meoyuda i rika i la kero bien!
-Madam Ojení no te desha dezmodrar en su apartamento.
-No v’a dezmodrar. V’a oyir sus konsejikas de kuando era la reina d’ermozura de Balat.
-No preferirías djugar kon otros ijikos?
-Vas a envitar otros ijikos ande la tant Maryet?
-Ayde, mi kerido! Kedaremos aya por una ora i iremos a Emiryán a komer halvachicha kon dondurmá.
TANT MARYET
La tant Maryet era la mujer del onkl Viktor, el tío de mi padre (el ermano de mi papú, Muíz). Era muy muy flaka, kon una nariz kroshé, i a mi – me paresía una brusha. Era mujer un poko eksentrika, i la djente la konsiderava komo «media loka».
Kuando nasió le metieron el nombre Zimbul. Después le trokaron a Merkada. Parese ke sus ermanos murieron i eya fue «vendida» para trokarle el mazal. Nunka no l’agradava este nombre, i kuando fue a la eskola franseza demandó de todos ke la yamen Margörit. Kuantos anyos después ke se kazó, desidió ke Margörit ya se izo demodé, i demandó de todos ke la yamen Maryet. En todo kavzo, en el direktorio de telefón de Estambol aínda estava enrejistrada komo Sümbül Sevi.
La tant Maryet se alavava muncho. Mos kontava ke su nombre de famiya antes de kazar era Altın Macar (en turko: Madjar de oro), ke sus padres vinieron de la Madjaristan (Ungaria), i uno de eyos izo los lavoros de oro para el palasio de los sultanes, i ansina tomó este nombre.
Kuando se envejesió muncho, desbrochó su boka afılú mas ke antes, i mos kontó ke un día, kuando era mueva kazada (esto sería en los anyos 1920s), vino a vijitarla una mujer de Salonik ke le kontó ke su marido Viktor, antes ke se kazó en Estambol, le avía prometido a kazarse kon eya en Salonik… En akeyos días una promesa de kazamiento era konsiderada komo un kontrato, i las mujeres puedrían prosesar si el ombre se arepintía. Maryet i su famiya pagaron munchas paras a esta mujer para ke se torne atrás a Salonik…
La tant Maryet no tuvo ijos. En sus últimos anyos mi padre le mandava un poko de parás ke los groshes ke resivía del governo turko no le abastavan. Kuando ya no pudía bivir sola, la tomaron al ospisio del espital djudió «Or A-Hayim» en Balat, i eya les deshó su apartamento.
MADAM OJENÍ
Musyú Alber i madam Ojení no tuvieron kreaturas. La djente dizía ke eya, kuando era manseva, tuvo munchos amantes i kuando kedava prenyada se operava para mover el embryo asta ke pedrió la kapachitá de emprenyarse.
Los dos eran muy diferentes. El era un ombre bueno, djentil i riyidor, i eya era una mujer sarkástika, kurnaza i muy titiza. Los dos me amavan i me davan muncha kara, i yo los amava, aún ke eya no savía komo tratarse kon kreaturas.
Me akodro una vez en Prínkipo (Büyükada) (yo tenía ocho anyos), ke no kije ir kon mi madre a vijitar su madrasta, i eya me deshó ande la madam Ojení. Ayá, después ke pasó muncho tiempo, ampesí a dezmodrar… Saltí enriva de los kanapés kon mis sandales. Madam Ojení tanto se inyervó i tanto me gritó ke mi madre la oyó de la kaye en viniendo a tomarme… Mi madre desidió a no verla mas durante akel enverano ke pasimos en la Turkía.
Munchos anyos después, kuando se murió madam Ojení, mi padre fue el exekutidor de su savá i ayá estava eskrito ke su sola eredera es su ija… I ansina salió en medio ke la mujer ke konosíamos komo su sovrina era en verdad su ija. Una ija ke tuvo de un amante turko, i ke la dio a su ermana ke la engrandesa.
Una istoria semejante oyí de una prima sigunda de mi madre – ke su madre biolojika la parió en Edirné sin kazarse i la embiyó a su ermana kazada en Filibe (Plovdiv), Bulgaria, ke la engrandesa ayá. Al tiempo afitavan estas kozas i no eran muy raras… Ama no se savía muncho porké todo era eskondido i sekreto…
BIGUDÍS
Kuando morávamos en Nişantaşı, muestros vizinos en el primer etaj eran el haver de mi padre, musyú Alber i su mujer, madam Ojení, ke eran 20 – 25 anyos mas grandes de mis parientes. Kada día de viernes, después de midí, madam Ojení suvía ande mozotros para ke mi madre le ayude kon los bigudís. Después ke mos fuimos a Israel, en la primera letra ke resivimos de eya, madam Ojení eskrivió ansina: «Viernes después de midí suví ande los vizinos muevos, i demandí de la sinyora ke me ayude kon los bigudís. Savésh komo me respodió? Me disho: ‘Akí no es un salón de kuaför’, i me serro la puerta en la kara!» Meldimos esto i mos patladeimos de la riza… La fraza «Aki no es un salón de kuaför» se izo una shaká de famiya…
I EL KUENTIZIKO BONUS:
ESTAMBOL, ENVERANO DE 1980
Anoche, mirando en el espejo, vide la kara de mi granpapá Alber. Lo vide muy klaro, komo fue ayer, asentado a la meza en la guerta de un kafé, riyendo, después de kontar una shaká a sus amigos de tavli. Su kuatrena mujer, Rashel la pahpahliya, mos vido, a mi madre i a mi, entrando al kafé, aserkando a la meza, i disho alguna koza a sus amigas. Después, ya supimos de una de estas buenas mujeres kualo disho: «Ayde, ya vino la ija a soydearlo a su padre».
Fuente: ladinokomunita
