eSefarad Noticias del Mundo Sefaradi
Estava muy triste. Desde ke se enbivdo de su mujer, su amiga verdadera de su vida, no le riyo la kara. No teniya gana de azer nada. 50 anyos eran kazados. Teniyan solo un ijo regalado. Lo engrandesyeron kon muncha kerensya i muncho amor. Lo protejaron komo un trezoro, lo guadraron de kaza i de ora mala. Izyeron sakrifiksyos grandes, kitaron de sus bokas para pagar los gastes de las eskolas. Solo ke se aga estruido, solo ke tenga un buen ofisyo, solo ke se gane su avenir. Agora, dospues ke el ijo presyado ya se engrandesyo, ya se kazo, ya merko kaza para el i para su famiya, i ya se esta mantenyendo bueno de su ofisyo, djusto agora, se le muryo la mujer. La unika amor ke konosyo en su vida. La unika persona ke saviya lo ke el dezea sin ke avra la boka para demandar. La soledad estava muy fuerte…
Le disho el ijo: «Papa, no te kero deshar a ti solo en esta kaza. No kero ke estes triste i asolado. Vendermos las dos kazas, la tuya i la miya, merkare una kaza grande, i tu ven a bivir kon mozotros. Agora, yo te va mirar a ti komo me miratesh vozotros a mi tantos anyos».
El no teniya dingunos en el mundo mas de su ijo regalado. Solo en su ijo teniya konfiyensa. Aksepto.
El ijo lo metyo a su padre en un hotel por un mes, vendyo las dos kazas, merko una vila kon una guerta maraviyoza i kampo grande de arvoles. En medyo del kampo fraguo un ahir i merko kavayos komo le arogo su ijo.
Dospues ke se eskaparon los aparejamyantos, lo trusho el ijo a su padre a la kaza mueva. Ven mira, le disho, ke ermoza kaza merki. Puedemos dizir ke la kara de la elmuera estava un poko amariya komo ke aviya menester de reshifrarla, i la mirada de rezolvar. Ama la kara del inyeto estava briyando de la alegriya, por ke lo keriya muncho bien a su granpapa. Estava tresalido ke el granpapa le va kontar kada noche kuentos i konsejikas fina ke el se va durmir.
Le dyeron, a su dispozisyon, una kamareta de echar, ke estava libre…
I la verdad, el granpapa no se neglijo de kontar konsejikas a su inyeto, kada tadre, antes ke se fueran achar.
Apenas pasaron unos kuantos diyas, la elmuera se empeso a keshar i le disho a su marido: «Tu padre esta ronkando komo una karpenteriya. No me esto puedyendo durmir. No esta de rezistir. Le trokaremos la kamareta i lo meteremos a la kamareta del tejado!» El marido ke no kijo diskusyon kon la mujer lo tomo a su padre i lo metyo en la kamareta del tejado. No se olvido de darle un ventilator porke ya se saviya ke esta kamareta era muy kaynte.
Apenas pasaron unos kuantos diyas, la elmuera se empeso a keshar demuevo i le disho a su marido: «Tu padre se esta alevantando kada ora i medya para pishar, el tavan es de tavlas, estan azyendo bruyido fuerte, me esto espertando. No esta de rezistir. El medyo ahir esta vazio, lo meteremos aya!» El marido ke no kijo diskusyon kon la mujer lo tomo a su padre i lo metyo en el ahir. Aspera, le disho, te va trayer la kuvyerta tuya.
El inyeto ke vido a su padre kon la kuvyerta de su granpapa en la mano, la tomo la kuvyerta, tomo una tijera grande i la korto la kuvyerta en tres pedasos. Le disho el padre: «Ijo, kualo estas azyendo? Deke la kortates la kuvyerta en tres pedasos?»
Le respondyo el ijo: «El un pedaso, papa, es para mi i mi granpapa ke de agora endelantre mos vamos a echer endjuntos en el ahir».
«I los otros dos?» le demando el padre.
«Los va guadrar para ti i para la mama, ke kuando vos vash a azer vyejos i vos vash a echar en el ahir, ke no vos yelesh!!!» le respondyo el ijo.
«Kuando el padre da a su ijo, riye el ijo i riye el padre. Kuando el ijo da a su padre yora el ijo i yora el padre».
