eSefarad Noticias del Mundo Sefaradi
Muy buemos diyas keridos.
Keshar de el estado, ya entendimoz ke hayre no esta azyendo, sino ke moz esta pujando los ingervos. Deshando de una vanda las keshas, a los ke tyenen el poder; va provar a trayer un kuento en las mis linyas.
El hahamiko de miz kuentos estava asentado en kaza, un livro delantre i el kafe al lado. Entonses sintyo ke baten la puerta. Se alevanto kon el penseryo ke «si baten mi puerta, demanda teneran”. Avyo la puerta… Un ajeno, se ve ke esta kansado, al pareser i ambierto tambien. Lo resivyo, lo asento al lado la meza, le demando si kere komer i bever. El ajeno, meneyo la kavesa, sinyando ke si kere komer i bever.
Despues ke komyo, bevyo i repozo. El haham le demando: “de ande vienes i kualo bushkas?” El ajeno le respondio: “ay diyas ke esto en kamino, esto abitado en el oriente de el pais. No kedo a ken demandar, repuesta no topi a mi demanda.” El haham enkantado un poko, le demanda “pasha, kualo es lo ke tu bushkas i no topates la repuesta?” Le dize el aĵeno: «bushko lo ke sinyifika la vida” ….
Esto fue una surpriza para el haham. Ma en todo kavzo penso a esplikar; lo alevanto a el ajeno, salyeron a la guerta. El haham tomo una kucharika de chay i la incho kon azete, se la diyo a el ajeno i le disho. “Toma esta kuchara entre tus dientes i da un torno en esta guerta, aze atansion a no vazyar el azete”.
El ajeno tomo la kuchara entre los dientes, avagar, avagar echando tino a no vazyar el azete. Adjusto el torno, vino a el lado de el haham. Kon alegriya grande, le disho: “alkansi a dar el torno en la guerta, sin vazyar el azete.” El haham le demendo: «i komo te impresionates de la guerta?” El ajeno disho: «estuve okupado kon el azete ke no se vazye!!” “Muy bien” le disho el haham “agora aze un otro torno kon la kuchara entre tus dientes i mira a lo ke ay en el deredor”. El ajeno salyo a dar el torno una otra ves, la verdad ke la guerta estava bien mirada, yena de flores a kolores, en kada paso ke dyo se maraviyo de la ermozura. Adjusto el torno, arivo a el lado de el haham. Le disho” te felisito, tienes una guerta muy ermoza, me gusto tanto.” El haham respondyo: «si ma azete no kedo en la kuchara. Ansi es i la vida. Sinyfika lo ke keres ver.
Si tal te aparas a un lugar fikso, la vida va koryendo, ma tu no te konsiyentes. Ma si te topas en el sentro de lo ke pasa i tu tomas lo ke te merese.
Mijorado para kada anyo, saludozos estesh. (A kontunear)
Albert Anah
Fuente: BÜLTEN de los Turkanos de Israel – turkisrael.org.il
