eSefarad Noticias del Mundo Sefaradi
Keridos amigos i amigas
En el Jewish News un artikolo interesante prezentado por Rebecca Davis tratando de un grupo Judio de konversos en Uganda..
Saludes a todos
——————————————————————————-
KONVERSOS EN UGANDA
En 2006 Zara Sarzin lavorava en World Bank». i fue transferida a Uganda. Asercando de Pesah, kijo topar un SEDER. Bushko en la komunidad de Ex-Patriotes i de Israelianos para partisipar a esta fiesta.
Se torno al Google i topo «ABAYUDAYA/djudios de Uganda.» Son 2000 i biven en 5 aldeas serka de MBALE en la parte rural del pais. Deven sus orijines al Leader Semei Kakungalu. En los anyos 1880 este ombre fue konvertido al kristianismo por los misioneros Britanicos. Kon el tiempo uvo un konfliktto i en segida de esto aprendió el judaismo i se proklamo ser djudio. Kon el tiempo su komunidad se konvertio formalmente i al fin La Agensia Judia rekonosió a Abayudaya.
Sarzin selebro Pesah en la aldea NABUGOYE i disho ke kuando Idi Amin reinaba en 1979 era defendido de praktikar el djudaísmo. Las sinagogas fueron destruidas. Sarzin al sentarse a la meza para selebrar Pesah kon esta djente tuvo un otro sentido. Eyos pensavan ke eran liberados en esta djenerasión. Despues Sarzin vijito a esta komunidad 5 vezes i preparo un dokumentado. En su ultima vijita vido ke las kriaturas meldavan la SHEMA i ke los ijos se asentavan al lado de las ijas kon la Kippa en la kavesa. Se Ivan a las klasas de ebreo. Las mujeres preparavan komidas de Kasher. Tenian mismo la Mikve. Israel Siriri es un Lider Abayudaya. El, su mujer, las kriaturas i las gayinas durmen de basho del lecho. Dize ke su dezeo es de ver a sus kriaturas ser edukadas i kazadas kon sjudios.
Ayi biven grupos diferentes unos al lado de los otros en armonía. Musulmanes, kristianos enbiando a sus kriaturas a las eskolas djudías.Tienen un sentimiento komunitario i komparten entre eyos las responsabilidades. Otra vez Sarzin fue invitada a la kaza de una madre sin marido. En tiempo de sena la kaza estava yena de djente. Eya tenia 5 kriaturas, ma al komer otras criaturas venian ayi tambien. Los Abayudayas eran djenerozos de natura mismo si tenian difikultad. En 2016 el pais paso por el seko. No avia komida i se izieron mas proves de lo ke eran antes. Se metian a vender todo lo ke tenian, azian emprestimos i las kriaturas eran retiradas de la eskola i a vezes no se tornaban atras.
Sarzin oy bive en Melbourne i vido lo ke es bivir en el seko. Esto tura muncho tiempo i unos mueren de ambre. Eya es una andjela i ayuda a los ke sufren.Tiene el buto de arrekojer 12.000 dolares para komprar alimentos para 42 famiyas en la rejion de NAMUTUMBA. Ayi biven 35 musulmanes i kristianos. Los djudios de la Australia kontribuyeron 17.500 dolares. Vino de los individuos, de las famiyas i de los estudiantes. Kon esto pasaron el seko. El problem aki es ke kontan sovre las tradisiones i no son efisientes en la agrikultura.
Esperamos de mejorar un dia a estas kondisiones.
Trezladado por Shimon Geron.- Sydney
Fuente: Ladinokomunita
