KOMO ESKABUYIR DE LA UNRWA por el Dr. Selim Salti

Dezde 2020 regularamente me entereso a las aktividades de la UNRWA. Mira mis artikolos del 19.5.2020 i del 02.6.2024; en estas eskritas avia dado a entender ke esta organizasyon fue kreada por los payizes arabos kon el buto de formar jenerasyones de arabos palestinianos yenos de inimista kontra el djudaizmo para poder destruyir el uniko estado djudyo. Kon el apoyo de las organizasyones islamistas i de sus amigos de la siedra ekstremista en el oksidente los dirijentes arabos miraron dezde el anyo 1948 a formar jenerasyones enteras de mansevos kombatantes para masakrar los djudyos de Israel i deke no del mundo. Orozamente en muestro tiempo, serka 8 milyones de djudyos son unidos en Israel i se saven defender.

A mi avizo personal me se asemeja ke ya vino el tiempo de kontra atakar a estos inimigos en gerrayando no solo en Gaza, en los territoryos de Yehuda i Shimron i en el Libano ma al nivel mundial. Bien entendido esta lucha devra ser organizada prensipalamente kontra el rejim de los mollah en Iran la mas grande yaga del Medyo Oriente i mizmo del mundo. Kon el apoyo del grande ermano aliado, Los Estados Unidos i los payizes amigos del oksidente de blokar totalamente el Iran ekonomikamente i diplomatikamente en universalizando por los medyos sosyales los danyos ke este rejim aze a su puevlo mizmo. Vino el tiempo de dar a la manseves iranyana los instrumentos ke le manka para eskabuyirse de este rejim relijiozo-fashisto.

En Israel yavino el tiempo de barrir delante la puerta i de tomar todas las prekosyones nesesaryas al nivel administrativo para defender la prezensya de la UNRWA en Gaza i en Yehuda i Shomron. Si será nesesaryo, ke la Kenesset vota una ley a este sujeto, kualkel será las kondisiones difisiles ke se enkontraran en los kampos diplomatikas kon los payizes arabos i kon los payizes amigos del terrorizmo muzulmano tal la Espanya, la Irlanda, la Norvegya, la China i mas.

Las Nasyones Unidas (UN) avian deklarado la UNRWA egzentada de ser defendida de lavorar. El artikolo 105 de la konstitusyon de esta organizasyon lo mansyona lo ke le da el derecho a no ser defendida en su aksyon. Ma si un payis desida de no kerer en su territoryo una organizasyon ajena la puede empidir de establisirse i mizmo de aronjar a sus ekipos si establise ke esta organizasyon esbivya las leyes, da ayudo al terrorizmo i mata a sus abitantes. La UN rekonose a los estados miembros el derecho de ser eyos mizmo egzentados de la obligasyon de impedir el lavoro de una organizason ke su buto no es de servir la umanita. Ademas la UNRWA no aze mas partida de UN visto ke eya no responde a la demanda de los refujiados de otras partes del mundo en okupandose solo de los arabos palestinianos. No es en ajustando a su nombre las letras U,N ke esta organizasyon aze parte de las Nasyones Unidas. Ademas la asistensya material ke resive de los payizes por lo mas oksidentales i de siertos payizes arabos a traverso el UN son montantes emprestados ke un dia deven ser retornados en el futuro. Koza ke parese kaji imposible.

De otra parte, des del anyo 1967 ke la UNWRA ampeso a operar en Yehuda i Shomron i en Gaza, su personal etranjero ke no depasa los 150 miembros entre los 30 mil arabos ke lavoran por eya, resivieron una permisyon provizorya de la parte del Governo Israeliano de operar sovre el kontrol de su otoridad ma ke a kada momento este permiso se puede anular. Ralos son los dirijentes ke enkavesan esta institusyon de ser konsiderados komo diplomatos.

La UNRWA fue kontra munchos prensipyos fondementales de los akordos umanitarios i de sus reglas. Permetyo ke armas sean stokadas en las eskolas ke fondo en Gaza, ke ijos chikos se ambezen a manipular armas i resivan un ensenyamento antisemito agresivo. Ademas a ke los elevos resivan una edukasyon jenosidaryo kontra el puevlo djudyo ke en prensipyo es kontra las leyes internasyonalas. El estado de Israel es ovligado de impedir a todo modo de terrorizmo i por esta razon la prezensya en su territoryo del UNRWA devra ser anulada sin falta a lo mas presto posible.