eSefarad Noticias del Mundo Sefaradi
Keridos amigos y amigas
En el Jewish News de esta semana «Yossi Aron» presentó un artíkolo sovre la komida komo un pensado de la Torá en Shavuot. La komida djuga un rolo signifikante en la práktika djudía. Komo lo savemos, los restoranes i tiendas de komida kayen en segundo rango al lado de las sinagogas en los suburbios djudios de las sivdades grandes. Ay una ekspresión ke dize «They tried to destroy us. We won. Let us eat».
En realidad la komida es la yave en las komemorasiones de elementos istorikos kreando la atmosfera por una okasion. La yave por Pesah es Masá i la industria kresyó sovre lo ke no se puede komer. En Sukot ay siertas kozas ke no son rekomendadas. Donde se deve komer?. En la Suka i no en la kaza. Las Leyes de la Torá metidas del lado, kozas dulzes se toman en Roshana, basadas sovre el azete como buermuelos i Doughnuts en Hanuka. En Purim tenemos orejas de Aman i Kreplah. Yom Kipur se abstiene de la komida.
El Festival de Shavuot es en munchos sentidos kalmo i repozado en relasyon a otros festivales. Del perspektivo de la Torá es simplemente la data de 50 días de Pesah ande un tiempo el pan se traiya al Templo. Shavuot tiene un aspekto gastronomiko ke es komer kozas de leche en el pranso «Torta de kezo i Blintzes de kezo. Por ke?. La Torá mizma se kompara a la leche. «Milk and Honey under your tongue»,»Leche i Miel enbasho tu lingua». Ansí los produktos lecheros son simbolikos del Día Grande en Sinaí. Indemás al resivir la Torá, el puevlo puede tener problemas kon la karne en sus posesion ke no fue preparada asegún las Leyes de Kashrut. Por esta razon fueron forzados a komer produktos ke no eran de karne. Otro faktor ke entra en djugo es ke La Tierra de Israel es de «Leche i Miel.» A la fin de lo ke trata de las Montanyas está eskrito en Salmo 68 komo ekspresion «Gav Nunim». Una formasión de korkovado ke parese a la «Gevina-Kezo». Una vez Yossi oyó de su «Rosh Yeshiva»Rabbi Shlomo Zalman Auerbach» avlando de «Moadim uZmanim» ke en Shemot 34-26-27 se topan las palavras «No laves la kreatura en la leche de su madre». Una ley ke defende mesklar leche kon karne i a fuersa de ize un Brit (M-aliansa) kon ti i Israel» [Instruksiones a Moshe]. Uno se pregunta komo es ke el Brit de la Tora fue echo entre Hashem (M-Dio) i Israel?.
Según el Midrash Moshe Rabenu abasho de Sinaí i los andjeles estavan en kontra de resivir la Torá. Pensavan ke kaya mas a los seres del sielo. En repuesta a esto Moshe demostró ke kuando eyos tenían solamente una Misvá a kumplir ke no avíyan pasado el test [Bereshit 18-8]. Kuando vinieron a Avraam a darle la notisya del nasimiento de Isaac, Avraam les dyo una komida de leche i karne de una vaka. Signifikando solamente en una komida. Del punto de vista de la Halaha ke es akseptable de komer los dos segun las leyes de separasión para selebrar. El fakto del mantenimiento de estas leyes mostraron ke meresemos ser los resipientes de la Tora.
HAG SAMEAH.
Tradusido por Simon Geron de Sydney,
Fuente: Ladinokomunita
