KOMBATIR LA INKONSISTENSYA DJUDIA por el Dr. Selim Salti (teksto i audio)

El puevlo djudyo es talentioso, por esta razón devia de prosperar i es destinado a prosperar oy en dia si no egzistiya el antisemitizmo. Yaga kronika no solo del djudaizmo ma de la umanita entera. No se topo i no se toparra la melezina a esta kalamidad a menos ke los djudyos sean konsientes de arrestarse de ser ’buenatchos’ (naive) komo fueron durante dosmil anyos, fina entender grasias a Herzl i a sus disiplos ke eramos kondanados a despareser del mundo si no retornavamos a muestra tyerra promitida en fondando el muevo Israel.

No mos alvidaremos ke despues de la Shoa los djudyos grasyas a la fundasyon de Eretz Israel en 1947 se salvaron por seguro, de un muevo olokosto ke los aspera si no se espertavan del yerro de azer konfiensa a la umanita i las potensyas muevas komo los Estados Unidos o la Rusia Sovietika. Finalamente los djudyos entendieron ke para defenedersen no podían tener konfiensa en dingunos, ke solo asi mizmo.

De muestro tiempo, la mayoriya del djudyo israeliano, despues de aver guerreyado multiple vezes, entendyo i se eskabuyo de la karakteristika de ser buenatcho. Munchos de eyos intienden el fakto ke este mundo no es un lugar amigavle para los djudyos i kuando se trata de defensya nasyonala, ke se deven solo apuyarsen en su armada fuerte. Ademas la mayoriya de los israelianos son konvensidos ke no se deve achetar la kresyon de una Palestina ‘armada’ en Yehuda i Shomron i mizmo son unanimos a apoyar los esforsos echos para impedir a ke el Iran se arme de la bomba atomika.

De mi perspektiva dire ke dainda se puede ver en los djidyos de la diaspora komo en los de Israel la egzistensya bova de kreyerse en la amista umana. Este estado los dezunida de akeyos ke son en majoriya realistos i konosen las sekanas de este mundo a los kualos me ajunto. Amista entre governos i muvementos relijiozos politikos no egziste, ma lo solo ke los preokupa es el interreso de sirkonstensya. Dunke devemos kombatir la inkonsistesya, por ke no ay garansiya en este mundo de interreso ke los puevlos poderan bivir eternelamente sin ser eliminados. No egziste garantiyas ke un payis bivera por siempre i ademas ser un puevlo moral no abasta a ser salvado de okupasyon o de masakros. En el kavzo de Israel la garanti de sobrebivir es de dotar el estado kon kapachidades eksepsyonalas i ansi renderlo fuerte. La formula para esto es la kreasyon de una ekonomiya alta ke permeterra de tener una armada fuerte i teknika. La kombinasyon de la ekonomiya kon la armada da apuyo alto a la diplomasiya.

Herzl avia predizido el futuro. El avia visto la vinida de la eksterminasyon de los djudyos de evropa i entendido ke la solusyon era de establisir un estado ke empidara su eliminasyon i ke la ayudarra a egzistir. En kreyando el sionismo, pensó, ke su buto no era solo de akuistar un tyerra onde será un lugar seguro para los djudyos ma ke ayudarra su puevlo a ser spiritual i moral. El avia vizyonado ke el payis djudyo será inovativo i ke los djudyos krearan teknolojiyas i mizmo saverisyo politiko kozas ke devian ayudar a la umanita a topar remedyos a sus problemas. Su punto de vista era ke el estado djudyo será su propyo defensor i no el enderechador del mundo. Justo komo su utopia, en realita la nasyon israeliana es inovativa i organizatrisa de sistemas de teknolojiya, ke es model para otras nasyones ke miran de kopyarla.

Ajustare ke, las jenerasyones pasadas ke se engrandesyeron kon las valores del muvemento sosyalisto o alternativamente kon las doktrinas de Rabbi Avraam Isak Kook tuvieron una vizyon flaka sin grandes konsikuensas sovre la sosiedad israeliana aktuala. Los ideólogos de los partidos de la siedra i del muvemento sionisto relijiozo komo Berl Katznelson ke fue el ideologo del sionizmo sosyalisto, ke pensó krear un model de sosyalizmo partikular para Israel i para la umanidad o Rabbi Kook ke miro de profetizar la regmisyon (geula)de la umanidad, kedaron sin influensa mayor en dia de oy. Por kontra el líder revizyonisto Ze’ev Jabotinsky en su tiempo salyo kontra todo modo de valor ajustada al Sionizmo de Herzl. El no estava de akordo a ke se ajuste valores sosyalas i relijiozas al sionizmo. El avia yamado esto ‘shatnez’ ke keria dizir ke paresiya a un panyo mesklado de lana i lino, defendido por la ley halakit. Jabotinsky fue el avokado del monizmo, el via el sionizmo komo solo i uniko, al kontraryo de los otros ke lo vian komo un dualizmo. Ansi el avia pensado a ke Israel será rejido por el kapitalizmo, libero i fuerte grasyas a su kreativita superiora.

Selim Salti

Fuente: BÜLTEN de los turkanos de Israel – turkisrael.org.il