eSefarad Noticias del Mundo Sefaradi
Komferensi
En la Alemanya de los anyos 1930, el nasional sosializmo, profitando de la demokrasia fue kapache de enganyar a toda una nasion evropea i tomar el poder i transformarlo kon un barbarizmo sin igual en una diktatura hitleriana, onde los efektos dezastrozos en el mundo fueron unikos. Muestro entendimiento de la demokrasia mos ovliga de no olvidar la istoria triste i yena de salvajería nazista de los anyos del 1933 al 1945, onde la sigunda guerra mondiala fue kavzante de la muerte de kaji sinkuenta miliones de personas, entre las kualas kaji sesh milyones de djudios, muestros ermanos de la diáspora evropea. Eyos fueron matados sin pekados, akuzados de ser responsables sin djuzgo de todas las desgrasias de la Alemanya i de otros paizes evropeos, onde bivieron miles de anyos, i onde kontribueron kon sus sensias, kultura i arte al dezvelopamiento de estos paizes i al avansamiento de los derechos umanos universales. Los djudios de la Alemanya se konsideravan puros patriotes i para eyos la asimilasyon era un proseso normal, ma el rejimen nazista desidio el kontrario en trespizando las leyes, defendiendo las ideas i opiniones liberales, la kreativita liberala, la independensia de desizion de las universitades i los akuzo de no apartener a la rasa pura alemana, ariana. El resultado fue ke entre los anyos 1933-1939 mas de 250 mil antifashistas, djente de alta kultura para salvar sus almas fuyeron del país. La mayoría de eyos eran djudios. En esta epoka serka 3100 personajes de sensia, eskrivanos, politikos, artistas, muzisienes , profesores de universitad, lideres de la ekonomia i la industria fueron ovligados de deshar sus patrias. Estos personajes fueron arondjados de las universitades, de sus lavoros, i mizmo internados en kampos de konsentrasion.
Una parte de esta elit ke se espanto de ser matada, desidio kon apreto en 1933 de ir bivir en Turkia, prensipalmente en Estambol, sivda onde se avlavan munchas linguas, egzistian, una al lado de la otra munchas kulturas i relijiones ,lugar kosmopolita, en un periodo onde los konfinos de la mayoria de los estados oksidantales eran serrados a los djudios. La okazion les fue prezentada por el governo turko el kual vido en eyos la posibilita de realizar su dezeo de modernizarse de emplear esta intelijensia ekselente ke le mankava i ke no savia onde ir.
Miro aki de tratar de este tema i deazer sovresalir la sezudeza del líder turko Kemal Ataturk, i de su derredor politiko ke supo profitar de la okazion, para krear en la djoven Republika Turka universitades sigun el sistema oksidental, i de transformar grasias a la partisipasion de los profesores alemanes las leyes del estado, en pasando de las leyes otomano-musulmanas, a leyes evropeas, establiser ansina muevas institusiones, para arreziar la baza del estado nasional, republikano i laiko. Ademas organizar la agrikultura, el urbanizmo, la infrastuktura del país, los ospitales, modernizar el sistema sanitario, introduizir la arte , la muzika klasika oksidantala, el teatro, la opera i mas..
Poko antes las fiestas del 10en aniversario de la republika, el estado turko, invito en primera faza, en el 1933 profesores alemanes en dizgrasia, la mayoriya djudios para fondar la Universitad de Estambol, la primera universitad kreada por los lideres fondadores de la republika, onde tuve el plazer de estudiar, komo munchos de mozotros djudios turkanos. Eya fue yamada «La Universita Alemana», la mijor afuera de la Alemanya.
Sovre las garansias dadas por el governo turko, al prensipio de la fondasion de la Universitad, 38 ordinarios i 4 profesores, en total 42 ombres de sensia, arivaron i empesaron a lavorar. Viendo el fruchiguozo dezvelopamiento inisial de la Universitad, muncho mas tadre djente de sensia alemana i austriaka fueron engajados para la Universitad de Ankara, la sigunda institusion akademika kreada al modo oksidental en la kapitala de la Turkia moderna. Puedo afirmar ke durante los anyos 1933-1955 serka 100 profesores, ke la mayoriia eran alemanes, shefes de katedra, lavoraron i ensenyaron en Turkia. Ademas sovre la invitasion de esta elit akademika, serka 500-600 dochentes, asistentes, lektores de universitad kon sus famiyas vinieron a bivir i a lavorar en Estambol i Ankara komo ensenyantes en veste de ayudantes, ogzilyarios akademikos. Munchos de eyos despues de aver estado unos kuantos anyos en el país, partieron para los Estados Unidos o otros paizes leshanos del planeta.
En esta okazion, permeteme de sinyalar ke en desparte de la djente de sensia i arte, 200-300 personas de orijin djudia i sus famiyas, malgrado las difikultades, parvinieron a resivir la permision de bivir en Estambol durante estos anyos de konflikto. Eyos eran komersiantes, gazeteros, muzisienes, avokatos, arkitektos, medikos, enfirmieres, artizanes i mas.. Por dar un egzemplo vos avlare de Hans Kitzinger, mansevo refujiado alemán, ke estudio kon el profesor Hirsh derecho en Estambol durante los anyos de gerra i kontinuo sus estudios mas despues en la Italia onde resivio su doktorato. A la fundasion del Estado de Israel el suvyo a este país, tomando el nombre de Kitron. El lavoro anyos en la Kenesset. De otro lado kero adjustar ke el arkitekto Herbert Eichholzer, malgrado ke era defendido, avia fondado un partido komunista de los estranjeros en Estambol, i kuando empeso la gerra mondiala retorno en Austria kon sus amigos para luchar kontra el nazizmo i aya fue aferrado i egzekutado.
Para konkluir digo ke munchos de los alemanes i austriakos ke eran ekspulsados por otros paizes, toparon azilo en este povre país turko, ke los resivio kon kompasion i se komporto bien kon eyos.
El lider eksepsional, Kemal Ataturk, fue influensado por la letra ke le avia mandado el savio Albert Einstein el 17 Septembre 1933 de Paris, el mizmo refujiado, a nombre de la asosiasion de los profesores djudios de Alemanya en egzilio” Ose”, rogándole de achetar otros 40 akademisienes djudios i de salvarlos de sus situasion dezesperada. Le eskrivio mizmo ke munchos de eyos ivan a vinir para lavorar sin ser pagados por el primer anyo, i ke se engajavan a ambezarse el turko en maksimum de 3 anyos , para dar mas despues sus kursos en esta lingua. Esto tuvo un efeto muy importante en el ministerio de la edukasion turko, i ansina empeso, se puede dizir, el proseso de deshar entrar kon fasilidad djudios evropeos de alta sensia en Turkia. Ataturk en 1926 avia yamado al profesor Clemens Holzmeister, arkitekto austriako, el kual se okupo de fraguar Ankara i la izo kapitala, a el profesor Eduard Zuckmayer, ke ensenyo por 32 anyos en el Estituto Gazi de Ankara la muzika i no torno mas a su país, al famoso muzisien kompozitor Paul Hindemith, a los konduktores de orkestra i opera Ernst Praetorius i Carl Ebert, ke eran muy serkanos al prezidente. Eyos operaron para enfluensar el derredor politiko de Ataturk kon 2 butos. El primer era de ayudar a la intelijensia jermanika anti fashista a despareser, en trayéndolos a Turkia i el sigundo de ayudar a este país mizerable, sin ninguna industria i agrikultura moderna, ke nasia de las sinizas del Imperio Otomano. Una forma de rekonosimiento i rengrasiamento por la ospitalidad del puevlo Turko.
Los instorianos i la mayoria de los refujiados alemanes trataron de este tema en eskriviendo artikolos i livros biografikos sovre sus vidas en Turkia, ma malgrado esto, oy dia, el sujeto no es muy konosido por el grande publiko. Aktualmente, grasias a la publikasion de romansos, ovras de investigasion i artikolos de eskrivanos turkos, ke fueron en sus tiempo elevos o kolaboratores de estos edukatores jermanikos, mos ambezamos la grande epopea de los profesores refujiados. Uno de los ralos rekodros de esta epoka es la plaka ke fue metida sovre una piedra monumentala a la entrada de la Universidad de Estambol por el governo Alemán en 1986 a la okazion de la vijita del presidente de la Republika Federala Alemana, para onorar el nombre estos profesores del puevlo aleman i rengrasiar al puevlo turko por averles dado azilo.
Los profesores djudios, durante todos los anyos ke bivieron al bodre del Bosfor en Estambol, o en la mueva Ankara, todo en deklarandosen a media boka ke eran djudios, o kazados kon djudios, no miraron de aserkarsen a las komunidades otoktonas. Malgrado esto uvo frekuentasiones, ma kon restriksion del espanto de la Gestapo prezente en Turkia, ke los espiava i a kada okazion los amenasava de munchas maneras. A lo mas, eyos se enkontravan en sus kazas o en el sentro alemán «la Totonia» en el kuartier del Tunel en Estambol o en las terasas del Park Hotel, ke se topa en el sentro de la sivdad enfrente del konsolato alemán. I komo les era defendido de azer politika aktiva, una de las kondisiones de sus kontratos de lavoro, no les gustava azersen ver o dar opiniones personales en publiko sovre la situasion del momento. Bien entendido uvo eksepsiones a este komporto, i munchas de la famiyas ashkenazis de Estambol, alikodaron kon plazer a estos alemanes kon los kualos avlavan alemán o idish.
Del 1939 al 1944 el antisemitizmo en Turkia avia pujado muy muncho. Las diskriminasiones echas a los djudios eran enkorajadas por los ajantes nazistas ke achakes sus propagandas, finansiavan la prensa ultranasionalista i se topavan en relasion serkana kon el uniko partido politiko de Ismet Inonu, el kual se avia deklarado «shefe nasyonal» kuando se izo presidente de la republika a la muerte del vizionario Ataturk. Su governo enkavesado por antisimitas miro de todo modo de arrebashar a la minorita djudia i de azer de eya sivdadinos de sigunda klasa, de forsarla al egzilio, de azerles pagar dasios enkreyibles, de eksluderla de las fonksiones publikas, en una situasion ekivoka, ke no se pensava al tiempo del Imperio Otomano. Malgrado su rasizmo fuerte, Ismet Inonu, nunka se mostro inimigo del Djudaízmo. I se konta ke el salvo de la muerte la mujer i la eshuegra djudias del shefe de orkestra Ernst Praetorius, el kual avia vinido a Ankara en el 1935 para fondar la orkestra filarmonika ke dirijo por anyos. Praetorius avia rogado a Inonu en unos de los konsertos, en la kulis onde el uzava vijitar, de entervinir komo primo ministro, para ke se les diera el visa de entrada a estas 2 mujeres. Supito dicho, supito fue echo. Es ansina ke eyas se salvaron de ser deportadas i pudieron vinir a bivir a Ankara.
La Turkia en los anyos 1930 i 40 del punto de vista ekonomiko era tributaria de la Alemanya nazista. Kaji el sinkuenta porsiento de las importasiones i eksportasiones se azian kon eya. Los kuadros dirijentes turkos de akea epoka en su mayoria eran formados en las universitades alemanas, ke desveloparon sentimientos pro-jermanikos. Ademas Hitler, en siega a la muerte de Ataturk, avia nomado su viejo kolaborator Franz von Papen komo ambasador a Ankara. La enfluensa i la kapachita de konviksion de este sinyor sovre los dirijentes turkos era renomada. Por esta razon Ataturk no lo kijo nunka bien, i no lo acheto komo ambasador durante su prezidensya.
Kuando en el 1939 empeso la gerra, la lojika de gerra remplaso akea de la paz. Sea la Inglitierra sea la Fransia empesaron a azer presion sovre la Turkia, para ke se engajara de sus partes. La Turkia deklaro ke eya va kedar afuera del konflikto i será un país neutral. Koza ke kontinuo durante 5 anyos i ansina no fue okupada por los Alemanes. Situasion ke konvino a la komunidad djudia de Turkia, onde sus miembros de mas de 80.000 personas i los refujiados jermanikos, mazalozos, se salvaron de ser eksterminados.
Verso la fin de la gerra los dirijentes turkos, viendo el ayre aboltar en favor de los Aliados, deklararon finalmente la gerra a la Alemanya nazista. En kortando las relasiones, la Turkia ovligo a los sin patria alemanes,” los haymatlozes” de ser enternados en el sentro de la Anatolia en chikas sivdades komo Yozgat, Chorum i Kirshehir, onde se kedaron mas de un anyo sin mezada i sin ayudo material. Los ke no achetaron de ser enternados fueron forsados de salir del pais. (Haymatloz, biervo enventado por los alemanes ke fue estampado en primera oja de los pasaportos de los djudios alemanes al lado de la famosa letra ‘J’). Durante la mizma epoka un muevo governo fue formado, mas liberal, ke dio un reflo de demokrasia en eliminando kaji a todos los pronazistas del poder. Esto bien entendido dio esperansa a todos los djudios del país, otoktonos komo imigrantes. Dospues de la gerra las kozas trokaron i munchos de los imigrantes yenos de nostaljia empesaron a retornar a sus paízes. El faktor tiempo i las injustisias ke arreyevaron no les izo olvidar el país natal. * Ansina eskapo en parte de kontarvos la epopea de los profesores alemanes.
LA REFORMA UNIVERSITARIA
Una de las preokupasyones importantes de Ataturk fue el establisimiento en Turkia de las Universitades modernas. Es establesiendo la tradision del ensenyamiento moderno oksidental el perkuro a ke las futuras jenerasyones de la manseves turka sean totalmente deskonektadas del sistem relijiozo de las medreses musulmanas. Ke el saverisio no sea ambezado solo de kavesa, ma ke sea produktivo del punto de vista sientifiko. Para reushir en esto era nesesario de importar el sistema oksidental. La sola institusion de altos estudios, kedada del Imperio era la ‘Universitad del Imperio’ yamada Darulfunun-i Shahane. El djoven i dinamiko ministro de la edukasion, el Dr. Reshit Galip, fue otorizado por Ataturk i su primer ministro Ismet Inonu de organizar en poko tiempo una mueva universitad. El la yamo «Universitad de Estambol» i envito al profesor suisso Albert Malche de vinir a Estambol i de aparejar la struktura de la institusion. Malche lavoro mas de un anyo i sumetio su raporto, ke fue votado i achetado en forma de ley en el Meclis (Parlamento). Ansina 600 anyos de ensenyamiento superior del Darulfunun tomo fin i fue remplasado por akel de la Universitad de Estambol ke empeso su lavoro el 13 Novembre 1933 en sus lokales de Beyazit. La Universidad posedava 4 fakultades: medisina, sensia,derecho i literatura. 624 mansevas i 2813 mansevos empesaron sus estudios debasho de la direksion de 180 profesores turkos i estranjeros. Los ordinarios en mayoria eran alemanes, 38 kontra 27 turkos. Los profesores eran 18 turkos i 4 alemanes. 93 dochentes eran todos turkos. Solo 59 de los 240 maestros del Darulfunun fueron permitidos de pueder ensenyar. Koza ke kreo konflikto i selo. Ma la Otoridad no permetio en ninguna manera diskusiones en seno a la Universitad. Ansi los profesores alemanes no se rendieron kuento de la inimista ke los entornava.
De otra parte Hitler no estava kontente de ver los profesores egziliados ambezar en esta Universitad, i avia mirado de azer toda la presion menesteroza enverso del governo turko, para ke eyos sean retornados en Alemanya. El avia prometido komo fue el kavzo en el 1930, de mandar al kuento de su governo, personas de sensia de alta kualita, superior a los ke se topavan en Turkia para ayudar a la edukasion universitaria. El sekretario del ministerio de edukasion Aleman, nazista notorio Herbert Scurla, avia vijitado Ankara en el 1939 kon este buto. El muevo ministro de la edukasion turko Hasan Ali Yucel ke avia remplasado al Dr. Reshit Galip ke murió muy mansevo de tikia en el mizmo anyo, refuzo la demanda de Hitler. El fue apoyado por el Konsilyo del governo turko i por la mayoría de la entelijensia de akel tiempo establesida en Ankara.
UNOS DE LOS PROFESORES
Dar a konoser uno por uno a todos estos personajes de sensia nesesita de aparejar una investigasion ancha i detalyada en forma de livro, lo ke no es el buto de esta avla. Ma malgrado esto de mi perspektiva personal keria dar una chika idea de los mas konosidos de eyos, ke desharon trasas profundas en la vida kultural, sientifika, sanitaria i edukativa en Turkia.
Herbert EICHHOLZER: arkitekto, estuvo del 1935 asta el 1943 en Turkia, elevo de Le Corbusier i amigo de Clemens Holzmeister, retorno en Austria para kombatir el nazizmo, fue egzekutado en Vienna en el 1943.
Clemens HOLZMEISTER arkitekto, urbanista, estuvo entre el 1928 i el 1954 en Ankara i en Estambol, planifyo la sivdad de Ankara, desino i fraguo el Parlamento Turko, i una grande parte de los ministerios. Ensenyo en las universitades turkas.
Paul HINDEMITH: Kompozitor, konduktor, violonisto i edukator de muzika klasika, fue uno de los inovatores del modernizmo muzikal del sieklo pasado. El fue engajado por el Estado turko komo konsejero artistiko, i estuvo vijitando el pais dezde el 1935 fin al 1943 kon intermitensia. No bivio muncho en el país, ma fue una de las personas prensipalas ke ayudaron a munchos a salvarsen del nazizmo. Ensenyo en Yale en los Estados Unidos despues la Sigunda Gerra Mondiala.
Ernst PRAETORIUS: konduktor de orkestra sinfonika, fondador i shefe de las filarmonikas de Turkia. Bivio dezde el 1933 asta el 1946, anyo ke murió en Ankara.
Carl EBERT: rejisor, profesor de arte klasika, estuvo en Turkia entre el 1935 i el 1944. El fue el fondador des las eskolas superioras de balet, opera i teatro del Governo. Lavoro i ambezo en los konservatorios de muzika i bayle klasiko oksidental. Bivio sus dalkavos anyos en Kalifornia, antes de retornar a la Alemanya en el 1961, anyo ke murió.
Eduard ZUCKMAYER: pianista, konduktor, profesor de muzika i de filozofía. El ambezo en el Enstituto «Gazi»’ de Ankara, del kual fue uno de los fondadores.( El biervo Gazi kere dizir en turko veterano, sobrenombre dado por el puevlo a Ataturk) Bivio dezde el 1936 asta el 1972 en Ankara, onde murio. Grande turkofilo, formo miles de muzisienes. Se kreyo en la senserita del puevlo ke lo alikodo, koza ke no salió malorozamente djusta. Mas tadre los profesores ke lo remplasaron en la eskola de muzika kemaron en el 2002 sus arshivos porke eran selozos i antisimitas.
Licco AMAR: violonista de orijin ungareza, estuvo en Turkia dezde el 1934 asta el 1957. Amigo i protejado de Paul Hindemith el fue profesor en los konservatorios de Estambol i Ankara.
Albert MARCHE: Profesor de pedagojia en la Universitad de Genevra, el solo invitado del governo Turko ke no era persekutado por los nazistas. De orijin suissa, el fue solisitado en el 1931 para aparejar la struktura de la mueva universitad ke Ataturk keria. El lavoro dezde el 1932 asta el 1934 en kolaborasion kon el Dr.Reshit Galip, ministro de la edukasion turko i aparejo el raporto sovre el sistema de la universitad de Estambol, ke fue a la unanimita achetado i muy bien visto por los profesores turkos i alemanes.
Fritz NEUMARK: Ekonomista finansiario, fondador de la fakulta de ekonomia de la Universitad de Estambol. Konsejero del governo turko, el ayudo a aparejar las leyes de las impuestas del puevlo. Fue el portavoz de los profesores alemanes enverso las otoridades turkas. Bivio en Turkia entre el 1936 i el 1952. Torno en Alemania i ambezo en la Universitad de Frankoforte onde fue en mizmo tiempo el rektor. Murio en el 1991.
Philipp SCHWARTZ: mediko , profesor de patolojia, presidente de la Asosiasion de ayudo a las personas de sensia alemanes en egzilio, fondada por el en Zurich i Londra. Grasias a esta Asosiasion, mas de 1700 personas de sensia fueron salvadas de Alemanya i aresentadas en otros países. Arivo en el anyo 1933 i se kedo fin al 1953. Murio en el 1977.
Rudolf NISSEN: mediko, profesor operator de grande fama, mondialamente konosido, ambezo a sus elevos las teknikas de operasion las mas muevas de akel tiempo. En el 1933 a 37 anyos fue nominado ordinario de la fakulta de medisina de la universitad de Estambol. En el 1939 por kestiones de salud se fue a los Estados Unidos i no torno mas a Estambol. Bivio el resto de su vida en Basel onde murió en el 1981.
Alfred KANTOROWICZ: operator dantista, profesor, arivo de Bonn en el 1933, organizo i ensenyo en la eskola de dantistas, fue envitado personalamente por Ataturk, torno en el 1948 a la Universitad de Bonn de la kuala se izo takavit.
Erich FRANK: mediko, profesor de hazinuras enternas. Arivo a Estambol en el 1934 i bivio en esta sivdad fin a su muerte en el 1957. Naturalizado turko, el formo miles de doktores en las klinikas de l’ospital universitario.
Ernst Eduard HIRSCH: juristo, profesor eminente de derecho en la Universitad de Estambol, fondador de la fakulta de derecho, principal kodifikator de las leyes del país, avia establesido los prensipios de baza de la ley deynda aplikada del derecho komersyal i avia aparejado el solo la ley de los derechos patentados. Arivo en el 1933 a Turkia, bivio fin al 1943 en Estambol i despues fin al l952 en Ankara onde ambezo en la fakulta de derechos de esta sivda. En el 1944 avia tomado la suditansa turka. Sovre la demanda de su amigo de egzilio Ernst Reuter mayor de Berlin, el desho la Turkia para azerse el rektor de la Universitad Liberala de esta sivdad. Murio en el 1985.
Ernst REUTER: Filologo de alemán, istoriano i jeografista, influente en la politika de su país, el durante munchos anyos fue politisiano, sosialista, elijido deputado i mayor de Magdeburg. Fue dentenido en kampo de konsentrasion, ma fue kapache de eskabuyirse i de vinir a Ankara. Avia servido en diferentes postos del governo turko i ambezo en la eskola de sensyas politikas, onde formo munchos diplomates turkos. El fondo la seksion turka del «International Rescue and Relief Commitee», grasias al kual pudo ayudar materialmente a los internados de Anatolia. Arivo en el 1935 i retorno a su pais en el 1946, onde fue eskojido komo mayor de Berlin. Murio verso la fin del 1953.
Bruno TAUT: arkitekto, profesor de urbanismo, bivio del empesijo de 1936 asta el 1938 en Estambol, onde murió. Spesilalisto de «arte mueva», el desino el muzoleo de Ataturk, por el kual no se izo pagar. Ambezo en la Akademia de Artes de Estambol. Es el solo djudio enterrado en en el simeterio de los veteranes de Edirnekapi en Estambol.
La lista puede kontinuar i ser muy larga. Ma permeteme de nombrarvos en kurto unos kuantos nombres mas de profesores.
Wilhelm Ropke, Dankwart Rustow, Gerhard Kessler, Umberto Ricci, Alfred Isaac, ekonomia.
Andrea Schwartz, Karl Strupp, derecho
Fritz Arndt, Felix Haurowitz, Gustav Fester, Friedrich Brensch, Otto Gerngross, kimika.
Wilhelm Salomon-Calvi, jeolojia. Harry Dember,fizika. Richard von Mises, matematika. Wolfgang Gleisberg, astronomia.
Gustov Oelsner, urbanizmo. Rudolf Belling, arte, fondador de la Akademia de Arte.
Martin Wagner, Margarete Schutte-Lithotsky, Gustav Oelsener, Martin Elsaesser, Franz Hillfiger, Wilhelm Litholsky, Ernst Arnold Egli, Andre Naville, architektura.
Alfred Marchionini, fondador de la fakulta de medisina de Ankara, Joseph Igersheimer, Max Clara, Wilhelm Liepman, Erich Frank, ke deskuvrio la insulina, Erna Eckstein, medisina. Wilhelm Peters, psikolojia.
Hans Reichenbach, Ernst von Aster, Walter Kranz, Walter Ruben, filozofia.
Kurt Bittel, Benno Landsberger, Hans Gustav Guterbock arkeolojia.
Leo Spitzer, literatura. Erwin Freundlich, astronomia. Ernst Engelberg, Clemens Bosch, istoria.
Georg Rohde, Erich Auerbach filolojia.
Alfred Heilbronn, Leo Brauner, botanika. Curt Kosswig, zoolojia. Fritz Baade, agrikultura.
Esto siguro ke estos personajes de alta valor ke no egzisten mas, sus vidas i sus sufriensas mos azen pensar a un fakto importante aktual, la egzistensia de Israel. Mi sentimiento es ke fue pekado de no tener un nido para mozotros djudios muncho mas antes de 1947. La istoria ansina, se iva eskrivir , mas diferentemente.
SELIM SALTI
RISHPON 2012
