eSefarad Noticias del Mundo Sefaradi
Keridos amigos i amigas
En el fin de la semana mi mujer i yo pasamos un tiempo en los Parkes o al Bodre de la Mar. Normalmente en kada lugar ay pasharos ke asperan ke les den a komer. Ay gaviotas, palomas, kuervos, kokaburras, mag pies ets. ay tambien unos pasharos ke son chikos ma bien alertes. Se meten todos a kantar en sus maneras, i yo los imito. Tengo konversasiones kon unos pasharos i me demando si pensar ke so un ser umano o un pasharo en avlando en sus lenguas. Si se echa una koza para komer en el suelo, saltan todos, se pelean i gritan para yegar a meterlo en la boka.Todo esto me izo pensar.
Saludes a todos
——————————————————————————-
KEN KOME I KEN SE KEDA MIRANDO
Las palomas i las gaviotas
Se pelean por unas mietas.
Ken va meter en la boka lo ke kaye al suelo?
En jeneral es el mas fuerte i rapido
Entre tiempo viene la kuerva
Vienen el magpie i la kookaburra
Gritando «A, aa, aaa» ‘Chui, Chui» «Kooka, Kooka Ho, Hoo»
I son los pasharos los mas chikos ke atrapan todo.
Por sierto es el ‘Sehel’ ke es mas efektivo
La taktika ke utiliza uno asegura su futuro
Chiko o grande, fuerte o flako, ke importa?
Kuando se save ke pasos tomar en la vida.
Ke lisión se retira de esto en la vida?
No es siempre el mas fuerte ke toma la komida
Tan chiko i flako ke sea uno, alkansa a todo.
Sin ke los mas afortunados se den kuento de esto.
Eskrito por Shimon Geron
el Pasharo/Umano
Sydney
Fuente: Ladinokomunita
