eSefarad Noticias del Mundo Sefaradi
Ver todos los artikolos de este kantoniko >>
—————————–
Mafalda es una karikatura arjentina publikada de 1964 a 1973 kreada por el umorista konosido komo Quino. Es una kriatura de sesh anyos ke reflekta los djovenos de al tiempo, preokupados por la sosieta i la paz en el paiz i en el mundo.
Mafalda es una ninya kurioza, inkieta i muy muncho ironika, nasida de una típica famiya de la sivdad de Buenos Aires. En un kuerpo de ninya eya muestra la reveldía de la mansevez markada por el progresismo. Empero Mafalda es una revelde djuisioza, no es una destruktora anarkika del mundo. Es arespondedora, kon un meoyo avierto i disposta a filozofar a partir de kualker fakto de kada diya. Reprezenta la ambision idealista i utopika de azer de éste un mundo mijor, mizmo ke la emburuja el pesimismo i se merekiya kuaji todo el tiempo por morde lo ke akontese. Le plazeria ambezar linguas i lavorar de interprete en las Nasiones Unidas para kontribuyir a la paz mundiala. Mafalda está konvensida del progreso sosial de la mujer i lo proteje fuertemente, algo abastante adelantado a su epoka.
EL OTOR
Joaquín Salvador Lavado Tejón (Quino): Nasio en Mendoza, Arjentina, el 17 de djulio de 1932. Fue nombrado Quino deke tenia un tiyo yamado Joaquin Tejón, ke era presiado artista boyadeador i desenyador grafiko, kon ken deskuvre su plazer por el dibujo. 
A los 18 anyos se troka a bivir a Buenos Aires para bushkar un editos ke kera publikar sus dibujos. Esto lo konsigio en 1954. En 1963 publika su primo livro de umor «Mundo Quino» ande estavan arekojidos sus dibujos de umor mudo kon akdama de Miguel Brascó.
Brascó lo empresenta en «Agens Publicidad» ke bushkava un dibujador ke iziera un komik para publisidad de una seria de elektrodomestikos de nombre «Mansfield» ande los 
karakteres devian tener nombre kon la letra M al empesijo, por morde esto kria Mafalda. A la fin Agens no aze la kampanya i Quino se keda ko los dibujos ke ya avia kriado. Ansi Mafalda, la ijika de kaveyos pretos ke no le plaze la supa i siempre esta en kontra de lo ke azen i pensan los mayores, se publiko por la prima vez el 29 de septembre de 1964 en la gazeta semanal Primera Plana de Buenos Aires. El 9 de marso de 1964 pasa a la pajina de umor del jurnal El Mundo i ansi el karakter Mafalda tiene ancho sukseso i se konose en toda Amerika del Sur i tambien en Evropa. quino.com.ar
