eSefarad Noticias del Mundo Sefaradi
Meldar todos los artíkolos de esta seksión
La vida do por e l raki , a ma non kero ser uno
El nombre del Dar ul i-slam, yaani: la Kaza del islam, komo un nombre aunante por tieras muslimanas i puevlos muslimanes fue endjendrado por la propia sivilizasion islamika ansina ke non se trata de una konstruksion de afuera ke fue aplikada kon fuersa al mundo islamiko ipersenzitivo. En la imajinasion islamika, este Dar ul-islam se topa en una gera perpetua kon el Dar ul-harb, demek la Kaza de la gera, un pan-nombre por todas las teritorias ke dainda no se sodjifitaron (la avana de la propia palavra islam es submision) al Allah i al Muhammed, el profeta del islam.
Si, a baze de la eksperensia personala de la vida kon i entre muslimanes, me metiera a deskrivir esta Kaza de islam, dishera ke se trata de una kaza ancha de kuatro kates.
En el primer kat se topan los del ahl ul-takwa , los yire shamayim, los temientes del Dio, baruh U; unos beshvaktileres ke dizen sus tefilotes sinko vezes al dia, ke ayunan en el Ramadan, ke fazen i rekomendan ma’asim tovim i se detienen i detienen a los de mas del haram asta ke los mejores de entre eyos, todo en una temor del kastigo divino en este dunya i en el ahira, afilu los pezgos meten en un sako de papel, mizmo komo metieron las serezas, para non yevar sovre sus alma el rovo karar del pezo de sako de pap el, porke kada uno deve de pasar sovre el sirat-chupri, el mas agudo de una espada i mas delgado de un pelo. Sus alamas estan basho un abdest kontinuo, mizmo komo sus kuerpos nurlis.
En el segundo kat biven los del ahl ul-fikh (espertos de alaha islamika) i del ahl ul-akida (espertos de dogmatika islamika), los ke instruyen a los birkatdjis. Sus solombra es lugar de kontemplasion.
En el treser kat moran los del ahl ul-mar’ifa, la djente de la gnoza, los bushkantes de la eksperensia personala de lo transedental, los sufis (mistikos) i evlis (hasidim), los ke dezean la serkania divina i amistad del Dio, alavado sea Su Nombre Santo. Sus kompania es un kamino derecho a la introspeksion, iluminasion i nefs-domestikasion.
En el kuarten kat se eskonden los del ahl ul-djihad, los duros i krudos gereros del islam, fanatikos i radikales, ke gerean kontra el Dar ul-harb i sus moradores vente kuatro oras al dia, siete dias de la semana, sin kompromiso i sin ningunas skrupulas, ancheando las udas del Dar ul-islam, konkistando tieras muevas i revanyo (todos los suditos del sultan se yaman ra’aya, ke es revanyo) muevo, o rekonkistando tieras i revanyos perdidos. Estos son muy demandantes tanto verso los kreyentes, sovre una kuanto i kuanto verso los deskreyentes en Muhamed i su livro. Kon eyos no ay diskusion: muerte, fuyida o submision! Kuando los mudjahides, kon sus modos i maneras totalas, totalitarias i radikales, al kavo adjuntan una tiera mueva a la Kaza del islam, la djente de los tres primeres kates, a lo largo del tiempo, pueden despues, ulay, poko a poko, afalagar al shok i a la trauma de los sovrebivientes de tieras muevo-konkistadas.
No, non todos los muslimanes son mudjahides! Munchos non tienen ninguna tendensia a praktikar el djihad de si para si; ama la mas grande parte de los muslimanes, inkluyendo a los sekulares, kultiva una reverensia tuaf frente sus ermanos mayores: los mudjahides. Tanto si la mas grande parte de los muslimanes no estan d’akordo kon las metodas de los mudjahides, jeneralmente no demonstran prontitud de kondonar al djihad, sus gereros violentes i sus metodolojia sangriente. Afilu en akeas pokas situasiones kuando uno de eyos se atreve de sepaparse del idjma, kere dizir del konsenzus komun de sus umma, para kondenar alguna atrosidad super-turbo-abominante, tanto este sadik del Sedom, kaji siempre adjusta un AMA.
Ama ay ke entender, ama ay ke kontekstuali z ar, ama ay ke…
En estos momentos de AMA, akeyos entre moz tros ke an kresido entre los muslimanes non pueden non konsentir ke sus amigos del chuchukbahce i eskola, de la univeridad o del lavoro, sus vizinos dezde siempre, les dizen realmente: Mira, el plazer es plazer; i el djihad es djihad. En estos momentos de la ultimativa verdad djihadeska uno tiene impresion ke los moradores de los tres kates primeros de la Kaza del islam se sienten averguensados por sus fleksibilidad i mundalidad, averguensados ke sus lucha fi sabilillah, en el kamino del «Dio», no es tanto absoluta, totala i despiadada komo la de los moradores del kat enaltesido.
Ke mos keda entonses a entender a mozotros los amigos de la djente de los kates primeros? Ke realmente somos sus floshedad? Ke en prinsipio no deverian tener kon mozotros una amistad, ama loke fazer… somos todos basar vadam?
La mejor metafora por este hal tuaf es el raki. Un musliman vero no la deveria ni tokar, ama munchos si la konzumen, todo en teniendo mucho remorso, o poko, todo el tiempo, o solamente durante el ramadan, kuando kada musliman i musliman deveria retornarse a las konfigurasiones orijinalas. Ansi tambien, en los momentos de la kayida de las maskaras, del desvalamiento total de la kara fea del djihad, parese ke los amigos muslimanes de mozotros ke vamos egzersiendo muestro derecho divino i umano de eskojer loke vamos a kreyer i loke vamos a deskreyer, komo si konsentian una inkomodidad profonda frente el espejo de akel ayet kuraniko (Suret ul-feth, 29) ke dize: Muhammed es el mensajero del Dio i sus segidores son striktos kon los infideles i piadozos de entre eyos.
En kurto dicho, paresido al raki , mozotros tambien somos komo una floshedad de muestros amigos yuchkatlis, una floshedad ke en prinsipio non deverian de tener, ama frente la kuala non se saven defender. Una floshedad, kuanto mas plaziente durante los dias normales, tanto mas averguensante durante los periodos del desvalamiento del kuarten kat de la Kaz a del islam. Ama, alora vino el torno de muestro AMA.
Ama, ken kere ser raki del otro? Una floshedad dinya de ser eskondido en los momentos mas graves de la vida? Yo? Nun holem, no i no! O, komo dishera una kantiga muestra vieja bijeja, si la desharemos de adaptarse un poko al mundo post-setenoktobresko*:
La vida do por el raki,
Ama no kero ser uno,
De disparidad ya me arti,
I de varibialidad de uno.
El djihad mos aze divorsar
amistades de oro;
La vida yo kero pasar
Kon rizas i sin yoros.
——————————-
* despues del 7 de oktobre 2023
Eliezer Papo es nasido en Sarajevo, Bosnia i Hercegovina i mora en Israel. Es avokado, rabino, eskritor i profesor en el Departamento de Literatura Ebrea en Ben-Gurion University of the Negev, Beer Sheva, Israel annde ensenya foklor i literatura popular, espesialmente literatura i kultura sefaradi. Tiene eskritos i artikolos en ladino, puvlikasiones i prezentasiones el kongresos i simposios.
Es protagonista del dokumental El ultimo Sefaradi (2003) una produksion de Alea / Televisión Española (TVE) / ARTE G.E.I.E
