eSefarad Noticias del Mundo Sefaradi
La Rusiya esta atakando la Ukranya, el mundo politiko se reboltonea. La situasyon ekonomika mondiala resive golpes duros, el varil de petrol suve al tarahem, la Evropa oksidentala riska de kedar sin gaz natural. Mozotros israelianos, visto esta situayon mos demandamos el sorte ke mos aspera, kuala sera la politika de muestro governo para poder kedar notral sin mesklarse al pleto de los dos toros ke se mezuran i se atakan en la arena evropa orientala. El uno amerikano el otro ruso, no se toman kon las buenas, por ke kada uno kere mostrar su superioridad, su supremasiya. Ke pekado tiene la Ukranya ke se izo una arena de sangre. Kualas serán las konsikuensas de esta intervansyon militara rusa, difisil de saverlas o mizmo de spekularlas.
En Israel se aspera miles de imigrantes ukranyanos, djudyos i non djudyos. Ken se gusta, ken no, porke no va ser fasil de establisirlos en el payis. Orozamente ke Israel tiene la eksperyensa de embolver imigrantes en poko tiempo en kuantidad. Siguro ke achakes del konflikto, las reaksyones negativas de los merkados mundiales se azeran sentir kon fuersa en muestro payis i el ke va sufrir lo maz va ser el sivdadino povre.
De otro lado, en tomando lisyon del pasado serkano, kualo pensar para embelekar los inimigos de Israel, ke por seguro saviendo ke la politika mondiala va trokar i ke no va ser la mizma después de la intervansyon rusa. Ken es ke save, ke jinero de mal mos poderan azer? Demanda ke miro de responder.
En enteresandome a las analizas i las eskritas de los espesialistos politikos ke konsejan los responsavles de la intelijensya i de la armada israeliana me ambezi ke kuatro pilares importantes kompozan la fuersa de la diplomasiya i de la defensya israeliana. El primer es la armada israeliana. Bien formada i antrenada, teknolojikamente avansada, superyora en taktika i en armamento i maz etika en la komparando a las otras armadas del Medyo Oriente. El sigundo pilar es, malgrado ke nunka el governo israeliano lo acheta, la posesyon de las bombas atomikas, las kualas dan espanto i deskoraje de atakar. El treser pilar es la alta teknolojia, la inovasyon i la kreativita del puevlo israeliano. Eyas kreyaron i kreyan un intereso bastante importante entre munchos payizes ke las nesesitan i ke miran por modo de sus interesos a estar en buenas kon Israel. Esto eksplika ke siertos payizes arabos inimigos de ayer se izieron los amigos de oy. Los akordos de Avram son un buen echemplo. Mizmo la Turkiya de Erdogan ke durante 8 anyos no se areto de mostrarse aliada del Hamas i inimiga de muestro payis, torno en teshuva en estos dalkavos diyas en mirando a krear un dialogo amigo ke promete una mueva kolaborasyon fruchiguoza.
El kuatren pilar es la grande amistad ke egziste entre Israel i los Estados Unidos. Los amerikanos dezde la fundasyon del estado djudyo nunka mankaron de darle el apoyo ke tenia demenester. En protejandolo en las Nasyones Unidas, en dándole el ayudo militar i finansaryo ke nesesito i en no faltando de partajar kon el sus valores moralas i kulturalas, eyos amostraron sus verdadera amista. Bien entendido Israel fue i es el mijor aliado ke esta grande potensya tiene en el Medyo Oriente. Bien entendido si los Estados Unidos son fuertes se entiende ke Israel se siente fuerte, al kontraryo si eyos dan la impresyon de ser flakos, los inimigos del estado djudyo miran si esta flakeza pode ser a sus benefisyos para atakarlo de kualker manera.
Esto pode ser un prejudisyo en las oras aktualas para Israel, visto ke Los Estados Unidos apersevido komo el guardyan de la paz mondiala, no supo i no tuvo la fuersa de aretar al prezidente ruso Putin kon su grande armada a entrar en Ukranya. Putin si reucha en su buto, eske a manyana gloryozo, el va kontinuar a serrar los ojos por los atakos ke Israel aze a las bandas de proksis iranyanos en Siria? De otra parte no se save komo se van a eskapar las traktasyones de Vienna sovre el nuklearo iranyano después de las muevas hohuentas de la partida rusa. Se entiende ke malorozamente los Estados Unidos kon un prezidente komo Biden, no va mirar ke su entereso i ken save si no va dar muevas konsesyones a los iranyanos, en dezenteresandose del Medyo Oriente.
Israel ansi será solo para defenderse i dunke penso en difikuldad.
Selim Salti
Fuente: BÜLTEN de los turkanos de Israel – turkisrael.org.il
