Poema: In Memoriam, Don Isak Navon, 1921 – 2015 / ELIEZER PAPO

In Memoriam, Don Isak Navon, 1921 – 2015

ELIEZER PAPO·LUNES, 9 DE NOVIEMBRE DE 2015

Karo prezidente, amigo i ombre enshemplario,
karo Mar Navon,
karo Don Isak,
karo Isak!
En favlando sovre los Sefaradim,
siempre eras dizien,
¨Mos dizen ke somos un punyado de djente,
non saven,
los zavalis,
ke,
segun la definision,
la aristokratia es siempre poka¨…
Un viejo refran dize:
¨Loke dize Reuven de Shimeon,
mos dize mas de Reuven ke de Shimeon¨,
i komo ¨refran mintirozo no ay¨,
tambien esta fraza tuya dezia mas de ti,
ke de tus konfratelos,
los Sefaradim,
de oy.
Ama,
tanto si non todos los Sefaradim son fidalgos,
tu lo eras de veras,
i komo ¨de kasta vienen los reyes¨,
tu komo el rey,
mos fizites kasta.
Al kavo del ravo:
¨Un rey sin djente, non vale niente¨.
Te saludamos,
Prezidente de Israel,
muestro paiz de siempre,
i rey de Sefarad,
muestro paiz imajinario,
rogando ke,
el Rey de los reyes,
el Santo bindicho El,
te de repozo enterno.
En Ganeden ke estes,
i sea tu alma atada en el atadijo de los bivos,
Amen!