Ke desho ke tomo otro un invyerno deshimos detras. Enverano es otra vida, un poko alokada porke keremos alkansar a todo.
Keremos kaminar, keremos emplear, ir a la mar i un poko djugar kartikas. De sorte las noches ya kayemos pyedra en pozo. En la manseves no mos paresiya ma agora ya mos estamos kansando i keremos trankilidad i repozar.
Yo ay kaji 10 anyos ke me vo a los kursos de muzika Turka. Ya vos tengo kontado ke topi en la Ada un kurso de muzika Turka i este anyo vine no vine me eskrivi i empesi a las lisyones,
Esta semana, el profesor mos trusho una kantika ke no la tengo oyido en mi vida, tanto ke syento i tantas kantikas ke me ambezi esta no la saviya ni la teniya oyido. Kijo dizir ke dainda ay muncho de ambezar.
Savesh la istorya de la primera vals Turka?
La kantika la konosiya muy byen ma su istorya no la saviya.
ABDULMEDJİD, Sultan del İmperyo Otomano. en los anyos (1839–1861). Era un rey muy entelektual, avlava el fransez muy byen i admirava la muzika i la vida oksidental.
Kuando torno, lo mando a yamar a su trono al kompozitor del palasyo DEDE EFENDİ.
Vino allado del Sultan i le demando: “ke puede azer por el”.
El Sultan le konto la nochada ke paso en el palasyo del rey de Austria i le dyo orden de kompozar una vals imedyatamente.
Dede efendi paso a su kamareta i empeso a pensar, en un diya komo se kompoza una kantika. El ke era auzado a kompozar kantikas mistikas i kon makames komo va kompozar una vals en poko tyempo. Ma no ay remedyo si no aze el orden del rey, merese muerte. Kon este penseryo no komyo no bevyo no durmyo.
Eya era chikitika, blanka komo la nyeve, ermoza i el estava ennamorado de eya. Eya lo vido triste se fue allado i le demando ke se pasa.
Dede Efendi le konto la kestyon, aunke era emposible de kompozar una vals en una noche, eya kon su dulsor le dyo moral i le disho:
Kon el moral de esta ermoza djariye, le vino una enspirasyon i empeso a aktuar las notas. Los byervos de la kantika enteramente es dedikada a la djariye Gülnihal.
Sim ten, gonca fem, bibedel ol güzel
Ateşin ruhleri yaktı bu gönlümü
Pür eda, pür cefa pek küçük, pek güzel
Görmedim kimsede böyle bir dilruba
Böyle kaş, böyle göz böyle el, böyle yüz
Aşıkın bağrını üzmeye göz süzer
El aman, pek yaman her zaman, ol güzel
El piel de oro, los muchos de brotes
Syempre keda ermoza
Tu kayentor me kemo el korason
Tu ermozura, tu chikes, muy ermoza
Yo no tengo visto esta manera una donzeya
Esta manera de manos, esta manera de kara
Syempre keda ermoza.
Esta vals, tuvo muncho sükseso, i entro a la kultura de la muzika Turka.
Forti Barokas
Fuente: turkisrael.org.il