eSefarad Noticias del Mundo Sefaradi
En pasadas, me envitaron a un festival de kontar konsejas.
La regla era, kada uno va kontar una konseja en su lingua maternel. En Griego, Siríaco, Kaldeo, Laz, Georgiano, Circasiano, Kurman, Zaza, Kurdo i por siguro Ladino. La aktividad se realizo en una eglisya katolika muy vyeja.
Los partisipantes, en kontando sus konsejas, en el barkovizyon estava eskrito en Turko.
Kuando me vino el torno suvi a la shena i empesi a kontar:
Aviya de ser un buen de naser. Antes 2.500 anyos, en el pais PERSA aviya un rey nombrado AHASHVEROSH, biviya en la sivdad SHUSHAN. El era governante del İmperyo PERSA.
Una noche ofre un festen ekstravagante para la djente del palasyo, para los representantes de la sivdad. Todos komen i beven, ma el rey se emborracha i sin pensar da orden ke su mujer VASHTİ se dezmude delantre de todos i mostre su ermozura. Vashti no aksepta este orden, el rey ke fue refuzado de su orde, de vista la kita de reyna i la manda del palasyo. A la demanyana da orden ke todas las ijas ermozas de la sivdad SHUSHAN, vengan al palasyo i se prezenten para ser reyna i ramplasar a VASHTİ.
“Este kavzo paso al rejistro del palasyo”.
En la mezma sivdad biviya un ombre djudyo, prove, nombrado Mordehay ke manteniya a su sovrina guerfana, nombrada ESTER. Kuando oyo el orden del rey Ahashverosh, desido de yevarla a Ester al palasyo del rey para salvarla de la provedad.
Entre tantas ijas, el rey la eskoje a la ermoza ESTER i la aze reyna de Persa. Ester siguro ke no le dize al rey ke es djudiya, porke ya estava enkomendada por su tiyo Mordehay.
Poko tyempo despues, Mordehay ke era portero del palasyo, oye dizir ke dos gardiyanes del palasyo azen planos para matar al rey Ahasverosh. Deskuvre lo ke oyo al palasyo, el rey ke oye esto, de vista da orden de enkolgarlos a estos dos gardiyanes i toma a AMAN por vizir. Aman, le desgusta Mordehay porke es entelijente i siguro djudyo. Un diya, Le da orden ke se enkorve delantre de el. Mordehay le dize, “mozos los djudyos no mos enkorvamos delantre de una persona, mozos mos enkorvamos solo delantre de dyo”.
Aman el malo aborrese Mordehay i empesa a azer planos para matar a todos los djudyos. Se va ande el rey i lo konvense a esta mala idea.
Ahashverosh, kita un edikto i da orden de matar a todos los djudyos de la sivdad. La data del orden se da kon dos dados, los dados mostran el 14 adar sigun la data djudiya.
Mordehay ke oye este plano, no durme noche entera i manda a yamar a LEA la servidera de Ester, le konta lo ke se pasa i le dize
“Va ande Ester kontale lo ke te dishe”.
Lea va en koryendo ande Ester
“Mi reyna! Vengo de ver tu tiyo Mordehay, estava muy triste”
“Ke akontesyo”?
“El me mostro un orden de Ahashverosh”
“Orden”?
“Todos los djudios deven de ser eksterminados, el 14 adar dingun djudio deve kedar bivo”.
“Ke se puede azer para kitar desta sekana muestro puevlo” ?
“En ti tenemos la esperansa”
“Ke poedo azer”?
“Va ande Ahashverosh i demandale la salvasyon de tu puevlo”
“Ken teine la ozadia de ir ande el rey sin ser yamada es kondanada a muerte”.
“Ester! No penses tu vida, ken save si no es el dyo ke te izo reyna, para ke salves tu puevlo”.
“Bueno, va dizele a mi tiyo Mordehay ke todos los djudios de Shushan agan taanit. İre ande Ahashverosh le dire ke so djudia i le demandare la salvasyon de mi puevlo”.
“Oh mi dyo! tu sos mi Rey! Ayudame! So sola i no tengo mas ke ti. No mos abandones i no mos deshes murir, dame koraje i fuersa para savlar mi puevlo”.
Ester dospues de azer taanit, se presenta ande el Rey. Kon todo su koraje le konta el komplo de Aman, le dize ke es djudiya i le roga de salvar su puevlo. El rey la pardona, lo enforka a Aman i le da el posto de Vizir a Mordehay.
Ester alegre, sale a la tarasa del palasyo i da orden:
“EL 14 ADAR SEYA DİYA DE FYESTA PARA TODOS LOS DJUDYOS”.
KANTA! KANTA Mİ PUEVLO! BAYLA! BAYLA EL BAYLE DE LA SALVASYON. KE NUNKA NO SESKAPE LA ALEGRİYA EN NUESTRO PUEVLO İ EN LOS KORASONES AMEN
BUEN PURİM İ BUENOS ANYOS.
Forti BAROKAS
Fuente: turkisrael.org.il
