Estamos Whatsapeando kon Albert Israel: «Timbros i la kultura sefaradi» 2 (kon boz)

Meldar todos los artikolos de esta seksion >>

«Timbros i la kultura sefaradi» 2

Yehuda Burla

Yehuda Burla (1888-1969) nasyo en yerushalayim. Eskrivano i profesor de eskola. Su livro «Luna» deskrive una istorya de amor entre los sefaradis de Yerushalayim. Su livro «La mujer aborresida» trata de la problema de divorso entre los sefaradis.

Fraza del dia: No ay luna komo la de enero, ni amor komo el primero.

WSP 06.01.2021

———————————-

Siona Tagger

Siona Tagger (1900-1988) nasyo en Yafo. Ija de una famiya sefaradi de Bulgaria. Era pintora famoza. Gano el «Premyo de Dizingof» i el titolo «kerida de la sivdad» de Tel Aviv. Pinto tambien sovre vidros.

Fraza del dia: De tu sivdad toma tus sapatos, mizmo aremendados.

_

WSP 07.01.2021

———————————-

David Polombo

David Polombo (1920-1966) eskultor israeli de orijin sefaradi eskulpio ovras nasyonalas komo «Las puertas del parlamento», la puerta de la «Tienda del rekuerdo» en Yad Va Shem i mas.

Fraza del dia: Boka dulse avre puertas de fyerro.

—-

__

WSP 10.01.2021

———————————-

Shearit Israel

Los primeros djudyos de New Amsterdam (New York de oy) vinyeron de Bresil en 1654. La komunidad fue organizada en 1706 debasho del nombre «Shearit Israel». La sinagoga en el timbro fue konstruida por eyos en 1897 i sierve la komunidad asta oy.

Fraza del dia: Ken a dos reyes sierve, al uno lo enganya.

—-__

WSP 11.01.2021

———————————-

Emma Lazarus

Emma Lazarus (1849-1887) era poetesa sefaradi amerikana. Su poema «1492» es un imno al anyo de la ekspulsion de Espanya i el deskuvrimyento de Amerika. El mas famozo poema «Muevo Koloso» esta gravado en la estatua de libertad.

Fraza del dia: Merka buena fama i echate a durmir.

WSP 12.01.2021

———————————-

Meldar todos los artikolos de esta seksion >>