eSefarad Noticias del Mundo Sefaradi
Oy primo del mez Junio, este mez mos aviza ke ya vino enverano. Yo tengo dos vidas, una de invyerno otra de enverano. A
Oy primo del mez Junio, este mez mos aviza ke ya vino enverano. Yo tengo dos vidas, una de invyerno otra de enverano. Agora vaja dizir kualo es dos vidas? La repuesta es, enverano bivo muy diferente de invyerno.
İnvyerno bivo kon planos i programes. Por egzempyo lunes i myerkoles tengo kursos, martes es diya de fixo kon las amigas de anyos. Djugueves es diya de empleyar i a la tadre al koro de kantikas sefrad el koro “NES”.
Entremyentes me vo a ver alos inyetos, a las ovras i fin de semana u teatros u filmos u konseres lo ke mos dyo el Dyo.
Este tempo kontinua fin ke se eskapa los kursos i se serran las eskolas. Los ijos se van vakansas i yo kedo solika de muerte no. Tomo la validja i me vo a la Büyükada.
Aki empesa la vida de enverano. Komo me alevanto muy denprano, no syempre de ves en kuando me vo kamino en el bodre de mar i dospues me vo a la plaj.
Sali no sali de kaza empeso a saludar i empeso a sudar. Porke kale ke des kuentos.
Bendicho el dyo la primera eleksyon ya la pasi.
Apenas entri a la plaj:
Si me fui demprano:
-Tu no vyenes estas oras ke te afito?
Sı vinites dospues de midi
-Deke vinites tadre?
(ke oras se vyene a la plaj no se)
-Oy no tyenes djugo
Si dishites si
-Kon ken dugas?
Si dishites no
-Deke?
un poko mas aya
-Atyo Forti halhal se metyo halhal
-Bravo a esta edad te metites halhal?
(en ke edad se mete halhal no se)
En pasando a la mar:
-Forti se engodro no?
-Yok canim se aflako
-Ayde deshalas ke digan estas muy buena mashallah
(neyse ya dyeron karar)
Si suvi a la guerta a djuguar aya es otro teatro.
(los nombres son imajinaryos)
-Sara no djugua kon Mari
-Mari no djugua kon Ester
-Ester no djugua kon Lili
-Lili no djugua kon Suzan
-Suzan no djugua kon Beki
A la tadre:
“ijikas amanyana a las 2 no kedesh tadre.”
Keridos lektores no kije ni djuzgar ni blamar a dingunos es ke me plaze azer shakayikas.
Ke no me manke mi puevlo, porke amigas es una terapiya muy grande.
Para kada anyo ke mos ayege el Dyo kon todos djustos.
HAG SHAVUOT SAMEAH.
Forti BAROKAS
Fuente: turkisrael.org.il
