En vista de Rachel: Zoom: De los Sielos para el Ladino por Rachel Amado-Bortnick

Ver todos los artículos de esta sección >>

 

Zoom, una maraviya teknika ke permete asta sienes de personas de reunirsen virtualmente, dio i esta dando un grande estimulo al Ladino.  Programas de Zoom en o sovre ladino van pujando de dia en dia en Internet, i estan atirando munchos seguidores. En estos dias ke estamos enserrados en kaza a kavza de la maldicha pandemia, la haveransa del Zoom kon el ladino es un regalo de los sielos ke mos traye munchas okaziones de reunirmos en un salon virtual, vermos las karas, saludarmos, i sintir kozas enteresantes, insturktivas, i munchas vezes divertientes. En inglez dizen “it’s a marriage made in heaven”, es un kazamiento ordenado de los sielos, la del ladino i Zoom. 

Este “kazamiento” esta dando rezultados muy reushidos. Los programes en ladino de la Itahdut – los de “Savor de Boka” kon mujeres i kon ombres, i el de Sara Kohen Yanarocak kon Kobi Zarko  –  resivieron munchas “vistas” ke los programes en turko. (Si no me kreyesh, anda a las gravasiones ke estan en Facebook i mirad kuantos “views” tiene kada uno.)  De Arjentina, la venerable institusion yamada CIDICSEF (Centro de  Investigacion y Difusion de Cultura SEFaradi) me invito a avlar en uno de sus programas sovre Izmir i el ladino.  Yo no avlo (nunka estudyi) el espanyol-kastilyano; les avli en ladino a una audiensa en bivo de serka 276 personas. La gravasion en Youtube tuvo asta agora 699 vistas mas. (No tantos komo los miles ke vieron los programes de la IYT en ladino, ma mas de los otros programes del Cidicsef.)  

Tambien tuvimos i tenemos kursos de Ladino. Mezo la Ermandad Sefaradi de los Estados Unidos, Bryan Kirschen ensenyo 5 semanas i yo ensenyi otras 6 semanas.  Tuvimos de 100 asta 250 elevos! En Buenos Aires, Liliana Benveniste kontinua a dar lisyones de Ladino a avlantes de espanyol kada semana, kon grande resuhita i munchos elevos. Esto todo, siguro, por Zoom.

Enkontros de Alhad: la seria enteramente en Ladino

I agora tenemos, desde dos semanas aki,  los Enkontros de Alhad ande se avla solo en ladino. Este projekto fue inisiado por Marcelo i Liliana Benveniste, fondadores del Centro Cultural Sefarad i  de eSefarad.com i aktivistos del ladino en Buenos Aires, para dar una platforma  de avlar el ladino en konversasion natural.  El program tiene lugar, komo es indikado, kada alhad, a las oras 13:00 de Buenos Aires, 19:00 de Israel, i konsiste de un Balabay i un Musafir.

Ay ocho “balabayes” ke representan entitades aktivas en la promosion del Ladino en diversas partes del mundo: Tamar Alexander (Autoridad Nasionala del Ladino, Israel), Shemuel Refael (Instituto Salti de Bar Ilan, Israel), Karen Gerson Sarhon (Sentro Sefaradi de Estambol, Turkia), Eliezer Papo (Instituto Moshe David Gaon de Israel), Jennie Laneurie (La Asosiasion Aki Estamos, Paris, Fransia), Bryan Kirschen (Binghamton University, NY, USA), Rachel Amado Bortnick (Ladinokomunita, kon 40 paises), i Liliana Benveniste (Centro Cultural Sefarad, Buenos Aires, Argentina.).

El primer Enkontro fue el 9 Augusto ande mos prezentimos todos los Balabayes i avlimos un poko de Djoha. (Lo podesh ver aki: https://www.youtube.com/watch?v=vpMitmZD8LI&t=2148s ). En el sigundo, Alhad pasado, yo fui la balabaya i entrevisti a mi musafir Moshe Shaul, el mas konosido aktivisto del ladino en el mundo. (https://www.youtube.com/watch?v=ZBgR-fnMss8&t=3384s ).   Al alhad venidero, la kerida Karen Sarhon va avlar kon Silvyo Ovadia sovre el Muzeo Djudio de Estambol, ke, sin duda va ser maraviyozo,  i va atirar sienes de oyentes. Anda a ver los detalyos aki: https://esefarad.com/?p=98606 .   No lo pedrash!  I no mankesh de asistir en todos los Enkontros de Alhad venideros.  

La pandemia mos alesho fizikamente de muestros keridos, mezmo de los ke estan en la mizma sivdad.  Ma el kazamiento del Zoom i Ladino mos izo aserkar a muestros ermanos sefaradis del mundo entero,  djuntos kon todo el ke ama muestra lingua.  Mos veremos en bueno ishallah este Alhad i en  kada reunyon de la “komunidad virtuala sefaradi” ke fue la kriatura del kazamiento de Zoom kon Ladino.

—————-

Rachel Amado Bortnick – Dallas