En vista de Rachel: Vijita a una ekspozision enteresante por Rachel Amado-Bortnick

Ver todos los artículos de esta sección >>

Keridos amigos,

Ayer mi ijo mos yevo a Fort Worth, ke es unos 45 minutos de kamino (kon oto, siguro) de Dallas. (Puede ser ya savesh ke el aeroporto Dallas-Fortworth es el sigundo mas grande aeroporto de los Estados Unidos. Este es situado, komo ya se entiende del nombre, entre las sivdades de Dallas i Fort Worth.)

Ya avia kuaje 5 anyos ke no ivamos a Fort Worth, ke es una sivdad ande se ve muncho la kultura “teksana” – algunos ombres visten chapeyos (“sombreros”) i las chizmés (los botes) i vestidos de kovboys (cowboys.) Ma mas muncho mos agrada ir porke tiene buenos muzeos. Ay mizmo un muzeo de “cowgirls” (mujeres kovboys) ma a mozotros mos enteresan las de arte. Ay tres deyas, una de arte moderno, una de arte Amerikano (de USA)- Amon Carter, i otra de arte istoriko mundial -the Kimbell. Seguro ke un dia no abasta para ver todo, ma si komo ya tenemos visto la koleksion permanete munchas vezes, mos agrada ir a ver las ekspozisiones temporarias. Ayer vimos las dos de Amon Carter, i la mas emportante, la del Kimbell.

Vos kero kontar un poko sove la ekspozision espesial del kimbell, ke se yama «Dutch Art in a Global Age” (Arte Olandezo en epoka Global) kon pinturas i objektos de la koleksion del muzeo de arte de Boston i del Kimbell. Siguro entre eyos munchas pinturas i gravuras (etchings) de Rembrandt, ke komo ya savemos tiene munchas ovras de sujetos djudios. Entre otros estava su famozo portreto de Menasseh ben Israel, ma agora se save ke la figura posiblemente era otra persona, i no el famozo rabino i imprimidor. (Aparte de ser rabino i autor, Menashe Ben IsraeI fondo la primera imprimeria ebrea en Amsterdam en 1626.)

Avia munchos objetos enteresantes, sovre todo de seramika i de kozas de plata lavrada. Travi fotos de unas kuantas kozas ke me vinyeron partikuarmente enteresante. Una de estas era una kucharera! Esta era para asukar, ma pensi ke puede ser el prototipo de la kucharera ke uzimos en la kultura sefaradi en muestra “tavlá de dulse”.

La otra era los dos “rimonim” del anyo 1649 ke deven ser de la kehila de Roterdam, fraguada en 1647. (En los dos anyos ke bivimos en Roterdam no supimos ke ayi se avia fraguado una kehila de sefaradim portugezos ( konversos redjudaizados) en 1647 , antes de la de Amsterdam, ke se fraguo en 1671.
Estos rimonim se paresen muncho a los de la sinagoga Touro.

Saludos a todos,
Rachel

________________________

Rachel Amado Bortnick – Dallas
Ladinokomunita