eSefarad Noticias del Mundo Sefaradi
Ver todos los artículos de esta sección >>
_______________________________________________________
Podiamos ser 200 miliones?
Apunto meldi este artikolo en Jerusalem Post sovre la ekspulsion de los djudios de Espanya, i los desendientes de los ke se konvertieron al Kristianismo, algunos de eyos «rekonektando kon sus raises.» El sr. Ashley Perry (uno de estos «bene anusim») ke tiene la organizasion «Reconectar», dize ke si no avia la Inkizision, agora iva mos ser 200 miliones de djudios. (No dize si esto inkluye los 6 milyones ke pedrimos en la Shoa, o no.)
Me parese ke el artikolo da algunas impresiones yerradas: El Edikto de Ekspulsion NO da la opsion a los djudios de konvertirsen. Solo (komo el mezmo artikolo lo dize en otra parte) arondja del pais a los djudios ke NO se konvertieron, para ke no ambezen el djudaismo a los ke se avian konvertido.
Tambien, ay muncha djente ke konfunden la Inkizision kon la Ekspulsion, i me parese ke la kava fraza del artikolo, ke el Edikto de la Inkizision» se anulo en 1834, adjusta a la konfuzion.
Ay munchos rabinos (lo mas reformistos) ke lavoran para ayudar a los «bene anusim» a rekonektar kon el djudaismo. Yo no savia ke el Knesset tambien tiene un grupo («caucus») ke se okupa de esto.
Rachel Amado Bortnick
Dallas, TX
Fuente: Ladinokomunita
______________________________________________________________
En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros sus komentarios sovre distintos butos.
