eSefarad Noticias del Mundo Sefaradi
Ver todos los artículos de esta sección >>
Sinagogas sefaradis de Georgia, USA
Kuando se avla de la istoria de los Sefaradim Otomanos ke vinieron a los Estados Unidos, se pensa de New York, Los Angeles, i Seattle. Ma en realidad Sefaradim de Rodes i Turkia vinieron en los primeros anyos del siglo 20 al sudest. del pais tambien, i formaron kehilot sefaradis en los estados de Alabama (Montgomery) i Georgia (Atlanta i Savannah)
Elias mos eskrivio un poko del 100en aniversaryo de la kehila sefaradi Or veShalom en Atlanta, ke su rabino es Hayim Cassorla, de famiya de Monastirlis. Yo lo konosko muy bien, porke kuando yo bivia en la area de San Francisco, el era el rabino de Magen David Sephardic Congregation en la sivda. ( Ayi, en 1985, tuvimos la primera komemorasion de la Shoa de los sefaradim en partikolar, ande yo meldi una poezia en ladino sovre la deportasion de Rodes eskrita de – si no me yerro – Sara Jerusalmi de Sout Africa.) Ay 9 anyos ke esta rabino
de la kehila Or veShalom en Atlanta.
Lo mas de los primeros sefaradim en Atlanta eran de Rodes, ma avia munchos de Turkia tambien, i los dos grupos avian formado dos «kehilot», kada uno asegun su minhag. Es kuando empeso la Primera Gerra Mundial (1914), ke desidaron ke devian aunarsen i formaron Or VeShalom. Al empesijo de las fiestas de 100 anyos de la kehila, el 9 de Febrero pasado, el Rav Marc Angel, rabino emerito de la kehila istorika Shearit Israel, «Spanish Porguguese Congregation», de New York, dio una konferensia. Komo ya savemos, el es de famiya Rodesli i
Turkana.
Komo mensioni, ay tambien una otra kehila de orijin sefaradi, Mikve Israel, en Savanna. Esta es muncho mas vieja i tiene muy interesante istoria. Fue fondada en 1733 por un grupo de 42 djudios de inglitiera, 34 de eyos Sefardim de la kehila Bevis Marks de Londra, i 8 ashkenazim. (Es la 3era mas vieja kehila en los Estados Unidos – despues de Shearit Israel en New York, 1654i Yeshuat Israel en Newport, R.I., 1658. ) La Sefertora ke trusheron eyos esta dainda en la kehila, i se uza en okaziones espesiales.
La fragua fue konsagrada en 1878.
Sigio «minhag prtugez» por munchos anyos, asta ke paso a azerse kehila reformista en 1904. I agora el solo vestijio de su minhag sefaradi orijinal es ke a la fin del dia de Kipur, kantan «El Nora Halila.»
Uno otro artikolo enteresante sovre esta kehila se puede meldar en :
Dize ke es lugar ke vijitan turistos, i ke tiene un muzeo enteresante.
Rachel Amado Bortnick
Dallas, Texas
Ladinokomunita
En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros sus komentarios sovre distintos butos.
