eSefarad Noticias del Mundo Sefaradi
Ver todos los artículos de esta sección >>
Keridos amigos,
Es difisil kreyer ke ya pasaron 13 anyos de kuando el grupo de Ladinokomunita estuvo en Turkia i, entre otros, vijitimos el ermozo kal de Ankara, ke estava limpio i bien kudiado mezmo ke entonses ya estava inaktivo desde munchos anyos. Espero ke munchos se van akodrar de esta sinagoga.
Ayer uvo una reunion de Ankaralis despues de 40 anyos i ermoza i emosionante seremonia en la mizma kehila, kon un konserto de muzika sefaradi kon el maraviozo grupo de Janet i Jak Esim de Estambol. (Janet nasio i se engrandesio en Ankara.) En la seremonia asistieron el Hahambashi Izak Haleva i otros dinyitaryos. Al pareser avia diplomatos ajenos ke no saviyan en turko, porke todo lo ke se avlo en turko fue traduizido al inglez. (I en esto uvo unos momentos komikos ke me izieron riyir.)
En introdusiendo los muzikantes, el Hahabashi disho ke su mama kantava las kantikas en djudeoespanyol mientres ke estava gizando i lavorando en la kuzina, i ke para el estas kantikas son komo orasiones al Dio. (Me impresiono muncho!)
Vos rekomendo de ir a sintir el karar ke podesh. (El konserto empesa al minuto 50. A la ora 1:00 empesa un grupo de 5 kantikas kon aranjamientos muevos. Muy ermozo.)
________________________
Rachel Amado Bortnick – Dallas
Ladinokomunita
