EN VISTA DE RACHEL: Mi poezia de Hanuka: KANDELIKAS CHIKITIKAS por Rachel Amado-Bortnick

Ver todos los artículos de esta sección >>

KANDELIKAS CHIKITIKAS

Aleshada de los milagros
de los Makabis i de la alzeyte,
m’asento i miro
a las kandelikas delgadikas,
chikitikas en mi diaspora,
sus flaka flama
en konkurensya
kon las grandes luzes
de kolores briyantes
de Noel.

Ma en esta toda shemata
me siento agradesida i kontente
ke tengo mi fiesta de luzizikas chikas,
porke son los aktos chikos –
respoder kon dulsura
fuyir de la ira
ayudar al menesterozo
sin hadras o baranas
i una sonriza  –
ke mos pueden salvar.
Bendicha seyga muestra tradision
de  dedikar las chikas kandelikas
en rekuerdo
de milagros grandes.

Rachel Amado Bortnick
Hanuka 2026
Inspirada por una poezia en inglez de Herbert Levine en:
https://www.jta.org/2025/12/09/ideas/liberal-thinking-jews-like-me-need-a-new-way-to-think-about-hanukkah

Ladinokomunita