eSefarad Noticias del Mundo Sefaradi
Ver todos los artículos de esta sección >>
_________________________________________________________
Los ultimos dos djudios en Monastir, i la Komemorasion de ayer
La istoria de los djudios de Monastir (agora yamada Bitola) es poko konosida, malgrado los artikolos i livros ke fueron publikados en este sujeto. La sivdad de 85000 inhabitantes se topa al sud de Masedonia serka de la frontiera kon Gresia.
El 11 Marso de 1943, mas de 3200 djudios de la sivdad fueron deportados al kampo de la muerte en Treblinka, Polonya. Solo 2% de eyos sovrebivieron.
Ayer tuvo lugar ayi una komemorasion de esta deportasion, kon la partisipasion de 200 personas ke vijitaron el bedahen (bethayim/semeterio) djudio, i kaminaron por la sivdad en la “Marcha de Vida.” Entre eyos se topavan los ultimos DOS djudios de la sivdad, Maria Behar (de 60 anyos) i su ijo Zoran. El padre de Maria fue salvado de la Shoa por un muslumano ke deklaro ke Moise no era djudio, era su ijo. Tambien estavan reprezentantes de la komunidad djudia de Skopje i un grupo de la organizasion de mansevos djudios, grupo de elevos muslumanos de lise, el ambasador Israeliano en Masedonia, Dan Oryan, i Zeev Elkin, Ministro de Asuntos (?) de Yerushalayim (“Jerusalem Affairs”). Avia tambien turistos ke vinyeron para la aviertura oy (lunes) del muzeo del Holokausto en la sivdad.
El Sr. Oyan se esta okupando de restorar el semeterio, i tambien organiza la Marcha de Vida de Vida en la sivdad. La Marcha oganyo se termino oganyo kon la konferensia de Elkin, ke apresio los munchos muslumanos de Masedonia ke ayudaron a salvar djudios.
Los partisipantes de Israel bolaron bandieras Israelis.
El artikolo de Jewish Telegraphic Agency de ande tomi estos detalyos mos konta ke un komersiante muslumano, Hassan Jasari, sovrino de uno ke avia rizgado su vida para dar agua a djudios asperando sus deportasion a Treblinka, disho Ke “Es maravia ver esta bandiera flotando aki, el mas manyifiko pais del mundo.”
Maria and Zoran Behar visit the Jewish cemetery of their native Bitola, Macedonia, March 10, 2019. (Cnaan Liphshiz)
I Maria Behar disho ke grasias a este evenimiento se siente komo ke no esta mas sola, ke tiene una famiya a su lado.
Este fue el mas grande evenimiento en la memoria de la komunidad djudia de Masedonia, ke konsiste de unos 200 djudios, kaji todos en Skopje.
Rachel Amado Bortnick
Dallas, Texas
Ladinokomunita
______________________________________________________________
En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros sus komentarios sovre distintos butos.
