En vista de Rachel: Lideres djudios en tiempos difisiles en Turkia

En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos. 

LIDERES DJUDIOS EN TIEMPOS DIFISILES EN TURKIA

En los ultimos mezes uvo unos trokamientos  en la komunidad djudia de Turkia, ke meresen ser mijor entendidos I apresiados.  En el 1 Avril 2010, Silvyo Ovadia termino sus sesh anyos komo presidente de la komunidad de Estambol, I a su lugar paso Sami Herman ke fue su amigo, kolaborador i vise prezidente. En 2 Mayo, 2010, el Rav Isak Haleva fue re-elejido komo Hahambashi (kapo-haham, o granrabino) del pais para sirvir siete anyos mas.

            Para mijor apresiar la valor de estos lideres ke lavoran por el bienestar de la komunidad djudia-turka, desidi de dar en este kurto espasio unas enformasiones sovre el posto de Hahambashi, de la administrasion relijioza i sivil de la komunidad, I de la situasion de de oy en el pais.

El Hahambashi o Granrabino

            El posto de Hahambashi fue establesido por el sultan otomano Mehmet II, konosido en turko komo Fatih , “el konkistador”, porke en 1453 avia konkistado Estambol, o Constantinopolis, de los Bizantinos. El Hahambashi Otomano representava a todos los djudios del imperio,  tenia grande otoridad I azia parte del divan (konsilyo administrativo) del sultan.   El primer hahambashi fue el Rav Moshe Kapsali (1453? – 1495?) ke estava kuando arivaron los egzilados de Espanya en 1492.  Despues ke el Imperio se desparesio, la Republika Turka ke tomo su lugar en 1923, adopto el sistema de Hahambashi.  En el Imperio Otomano el Hahambashi kedava en su posto asta su muerte, i  ansi fue tambien kon los grandrabinos en la Republika – Haim Moshe Becerano (1920 -1931), Haim Ishak Saki (1931–1940), Rafael David Saban (1940–1960), i David Asseo (1961–2002). El Rav Isak Haleva se izo Hahambashi en 2002, despues de la muerte del Rav David Asseo, d.b.m., ke estuvo en este posto por 41 anyos.  Poko despues el governo troko la ley, metio el limito de 7 anyos, I ovligo de tener eleksiones en la komunidad para este posto.

            Ansi es ke la eleksion del Hahambashi oganyo fue un evenimiento istoriko.  Por primera ves el publiko djudio, I no el “bet din” (konsilyo relijiozo) komo antes, deskojo el granrabino.  Fue tambien una eksperiensa de demokrasia verdadera para la komunidad porke uvo dos kandidados, el otro siendo El Rav Eli Levi, turkano ke izo aliya a Israel 15 anyos antes.  Las eleksiones tuvieron lugar en las sivdades de Estambol, Adana, Ankara, Antakya, Bursa, Chanakkale, Izmir, i Kirklareli.   Uvo  4631 votos (solo 403 de afuera de Estambol),  4268 para el Rav Haleva, i 343 (serka 8 %) para el Rav Eli Levi.  El haber fue publikado en jurnales I media turkos ansi ke etranjeros. 
 

 
Administrasion Relijioza I Sivil

            El semanal djudio Shalom de Estambol dio grande lugar a las eleksiones, a entrevistas kon el Rav Haleva, kon Silvyo Ovadya, I kon Sami Herman,  I a artikolos de alavasiones I felisitasiones para eyos.  No ay duda ke eyos ganaron una admirasion muy meresida de parte del publiko djudio.

            El  granrabino es naturalmente el shefe relijiozo de la komunidad turka entera, i tiene el ayudo del el konsilyo relijiozo.  Ay tambien un konsilyo sivil en kada sivdad kon komunidad djudia, ke deskoje su prezidente.  (En Izmir, el presidente es el infatigable Jak Kaya, vizino i amigo de chikes mio.)  La mas grande komunidad de Turkia esta en Estambol (kon unas 23000 personas, de las 25000 en el pais), I por esto el presidente de la komunidad tiene un rolo mas emportante i visible en el pais.  Las  administrasiones sivil i relijioza en munchos kavzos tienen ke kolaborar, i tomar desiziones endjuntos.

En el pais oy

            Kuando el Rav Haleva i Silvyo Ovadya vinieron a sus postos mensionados antes 6-7 anyos,  la Turkia avia entrado en un periodo de trokamientos politikos, legales i sosiales, despues de la eleksion en novembre  2002 del El AKP, el partido kon sempatia al Islam, ke dainda esta en el poder.  Ma el muevo governo estava dainda en buena relasiones kon Israel, i establesio buenas relasiones kon los lideres djudios.  Si vos akodrash, kuando akontesio el atako teroristo de 15 Novembre 2003 en Estambol (bombas en las sinagogas Neve Shalom i Bet Israel mataron 20 personas, 6 de eyas djudiyas, i firieron unas 300) todas las otoridades turkas dieron apoyo a la komunidad djudia.  Malorozamente, kon tiempo el pais entro a un atmosfer de antipatia a Israel, i pujaron las ekspresiones publikas de sentimientos anti-Israeli i anti-djudias.  En  2005 la version en turko de “Mein Kampf” (el livro del maldicho Hitler) i “Los Protokoles de Sion” estavan entre los mas vendidos.  El antisemitismo en el pais yego a un grado kritiko durante la gerra de Israel en Gaza en enero de 2009.  Una  enkuesta de Mayo 2009 amostro ke 45%  del publiko turko no kere tener un vizino djudio, i ke 90%  del puevlo nunka konosio un djudio! (Los 25,000 djudios konstituen una minoria miniskula en un pais de mas de 70 milyones muslumanos.)          

            Durante estos tiempos duros, el rabino Haleva i el sinyor Ovadya fueron lideres korajozos, aktivos, i devuados.  Sus esforsos para arestar el antisemitismo, para fomentar un buen imaje de los sivdadinos djudios, no se pueden kontar.  Tuvieron enkontros kon el prezidente Gul, kon eI primo ministro Erdogan, kon representantes de las otras komunidades relijiozas, kon la prensa, TV, i mas. Sovre todo Silvyo, salia a la television o eskriviya  letras i artikolos en los jurnales imediatamente despues de algun akto antisemito o deskriminatorio.  (El era el editor del Shalom antes de ser presidente de la komunidad) Las reaksiones ke resivio a vezes fueron buenas, ma a vezes negras, asta ser amenasado. 

            De otro lado, estos lideres tuvieron ke konfrontar los problemas de alientro de la komunita tambien, komo los kazamientos mikstos, i aleshamiento de djudaismo, ansi ke los desfiyos de mantener sinagogas, ospitales, eskolas, etc. kon los pokos manaderos finansiales de la komunidad chika, ke un tiempo era muncho mas grande.  Durante estos anyos se establesieron programas edukativas i kulturalas para enteresar a los mansevos, las kriaturas, i todos, i tambien para dar a konoser el djudaismo al publiko ancho.  Se dio emportansia a la erensia sefaradi, sovre todo kon el establesimiento del Sentro de Kultura Sefaradi, enkavesado por Karen Gerson Sarhon,  i la publikasion de El Amaneser en djudeo-espanyol.  Se avrio muevas komunikasiones kon otras komunidades djudias en el mundo, i se avrio sitios de Internet para dar a konoser la komunidad i su estorya.  (Vos rekomendo, por egzemplo, meldar en inglez la biografia del Rav Haleva en el sitio de la komunidad i de ir a meldar los esayos en el sitio del Sentro Sefaradi.

            En 29 Avril 2010, el enerjetiko muevo presidente djudio Sami Herman tuvo una vijita formal de una ora kon el primo ministro Erdogan, i de esta manera ya establesyo buenas relasiones kon el governo.  Lo felisitamos a el i al Rav Haleva demuevo, i les oguramos munchos mas anyos de fuersa, sezudesa, salud i vida, i reushita en sus lavoros por el djudaismo en Turkia.

[print_link]