En vista de Rachel: La valor del Dia Internasional de Ladino

En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.

Ver todos los artículos de esta sección >>

La valor del Dia Internasional de Ladino

El 5 Desiembre 2013, o el 2 Tevet 5774, ademas de ser el kavo dia de Hanuka, fue tambien el Primer Dia Internasional de Ladino, ke se fiesto en munchos lugares del mundo en el mezmo tiempo (o kuaje en el mezmo tiempo.) Avlantes i amantes del judeoespanyol – en Arjentina, Brazil, Bulgaria, Espanya, Estados Unidos, Fransia, Israel, Meksiko, Turkia, I Uruguay –realizaron programes para espandir el konsimiento de la lingua I kultura sefardi, I gozar de su ermozuras.  El fakto ke muestro program en mi sivdad, Dallas, se anulo akel dia a kavza de la luvya entezada ke kuvrio todo de buz, no amenguo nada de la grande reushita ke tuvo este Dia por el mundo.  ( El de Dallas agora esta reprogramado para el 12 enero, 2014.)

El mas grande evenimiento fue en Israel, en el gran oditorio de la Universidad de Bar Ilan de Tel Aviv, ande unas mil personas (inkluyendo Izhak Navon, el 5en prezidente del Estado de Israel i presidente de la Autoridad Nasionala de Ladino),  asistieron en un dia entero de  konferensias, muzika, sketch teatral, atelieres, i mas.  Un otro fue el maraviozo program de Seattle, Estados Unidos, ke tuvo lugar en la Universidad de Washington preparado i realizado kon la kolaborasion de la komunidad sefaradi i los profesores Devin Naar i David Bunis. Proklamasiones ofisiales de la munisipalidad  i el estado deklararon el 5 Desiembre, 2013, komo “Dia de Ladino i de Kultura Sefaradi.”  En Espanya, en la Universidad de Murcia,  la sola universidad Evropea ke se adjunto a las selebrasiones oganyo, lebro el Dia de Ladino, la renomada Profesora Paloma Díaz Mas, espesialista en la istoria sefaradi i autora del bien konosido livro “Los Sefardíes”, dio una konferensia a los estudiantes de la Fakulta  i su traduksion en inglez.  (Podesh ver el video de su konferensia, i detalyos de todas las aktividades del Dia de Ladino en el sitio http://www.eSefarad.com/didl.)

En kurto, la idea de estableser un Dia Internasional de Ladino ke tuvo Zelda Ovadia (de Israel, orijinaria de Estambol) i la propozo por primera vez en Ladinokomunita[i], fue realizada oganyo kon gran entusiasmo i reushita. Ma mi buto aki no es kontar todo lo ke se izo en esta okazion, si no ke eksprimir mis pensamientos sovre la valor de tener un Dia Internasional de Ladino, agora i en el avenir.

Para kualo un Dia de Ladino? 

“El dia esperado desde hace 500 años” eskrivio Marcelo Benveniste en el sitio http://www.eSefarad.com/didl .   No mos podieron venser los ke mos ekspulsaron, mos bavtizaron por fuersa, o mos kemaron bivos, o yevaron a kampos de muerte en la Shoa.   Estamos sanos I bivos  grasias al Dio, kon muestro djudaismo,  i muestra lingua espanyola enrikesida afuera de Espanya.  Meresemos un dia para fiestar I dar a konoser este ekstraordinaryo fenomeno.  La fiesta mos ayudara a yevar muestro trezoro kultural al avenir.

Los ke nasimos i kresimos kon el ladino ya kedimos pokos en vida, i  estamos dispersados por todas las parte del mundo – munchos de mozotros asolados en muestras sivdades.  Verdad ke en muestras kazas i entorno mas  ya no avlamos la lingua de muestros padres, ma nunka mo la olvidimos.  Eya bive siempre en muestras almas,  korasones, i myentes.  En eya mos akodramos del karinyo de padres, madres, i todos los ke mos kudiavan, mos ensenyavan,  i mos alegravan en muestra chikez.  Por esto bushkimos de aunarmos kon otras personas komo mozotros en muestros lugares I por el mundo entero.  El Internet mos ayudo a komunikarmos de leshos, mos aunimos “virtualmente” en un sitio komo Ladinokomunita, i munchas vezes podimos tambien enkontrarmos en persona.  De tantos paises, kada uno kon su lingua diferente, tenemos  solo una lingua en komun: el “espanyol” (o ladino, o djudio) de muestra chikez, de muestra kultura, de muestra identidad djudia-sefaradi. Ke plazer ke tomamos de avlarla, meldarla, eskrivirla, i kantarla endjuntos!  I ke alegria topar en munchos paises non-sefaradis,  sean judios o no, ke konosen el ladino, la apresian, la estudian, la investigan, i publikan “de lo muncho i bueno” en i sovre  eya.  Por esto es ke Zelda Ovadia, en su propozision de tener un Dia Internasional de Ladino disho ke es para todos los ke tienen a koro i se interesan del djudeo-espanyol, su kultura i istoria, i de su riko patrimonio.

Ma asta agora no teniamos el sentimiento de unidad I de kolaborasion en favor del ladino.   Este sentimiento mos se formo en torno del Dia Internasional del Ladino, en komunikandomos de parte a parte los detalyos de programes ke estavamos preparando para realizarlo,  kada uno en muestro lugar.  Mos enkorajimos i mos apoyimos de parte a parte en Ladinokomunita, i mos alegrimos en djuntos de kada reushita.

Este atmosfer de union topo su refleksion konkreta en http://didl.com.ar/ , el sitio establesido por Marcelo i Liliana Benveniste de Buenos Aires espesialmente para el Dia Internasional de Ladino. Marcelo i Liliana son entre los mas dedikados i aktivos miembros de la  komunindad sefaradi mundial, i dirijen tambien el maraviozo boletin elektroniko eSefarad (https://esefarad.com/  ) ke fondaron 5 anyos atras.  Del momento ke la djente supo ke se iva selebrar el Dia Internasional de Ladino,  algunos kijieron saver si avia un sitio sentral en Internet para topar enformasiones sovre esto.   No  avia entonses.  Ma en unos dias ensupito ya avia http://didl.com.ar/!   Kada uno empeso a mandar los detalyos, anunsos, videos, I mas a Marcelo, i al momento ya estava en el sitio. Fue un regalo grande de muestros amigos, ke enfortesio el proseso de aunamiento ke mensioni.  Espero ke al anyo ke viene, i de agora endelantre kon bueno, este sitio (o otro) sera aprontado demprano, i en kolaborasion kon La Autoridad de Ladino en Israel, para ayudar a organizar mas munchos aktos de Dia de Ladino por el mundo.

Para el avenir 

El UNESCO dedika el 21 fevrero al “Dia Internasional de Lengua Materna”, para “promover la prezervasion i proteksion de lenguas uzadas por los puevlos del mundo.”[ii] Eksplika ke una lengua es el  instrumento mas poderozo para prezervar i desvelopar la erensia konkreta i spirituala de su puevlo, i ke los aktos echos para la difuzion de una lingua materna sierven a ancheyar “el konosimiento de tradisinoes linguistikas i kulturalas por el mundo i inspirar solidaridad bazada en entendimiento, toleransia, i dialogo.”

Me parese ke el ladino, la lengua materna de sefaradim, o djudios espanyoles, absolutamente puede “inspirar solidaridad bazada en entendimiento, toleransia, i dialogo.”   En su larga istoria eya bivio en tierras de muslumanos i kristianos, en konvivensia kon puevlos de diferentes kulturas i linguas. Ma no es menester ke el dia dedikado a eya se fieste en la data establesida de UNESCO.  El Dia de Ladino esta fiksado en el kavo dia de la fiesta de Hanuka, el 2 Tevet del kalandaryo djudio (troka kada anyo en el kalandaryo gregoriano.)  De esta manera deklaramos ke el ladino, aun kon su rais espanyola, es una lingua djudia.  Ke bueno ke sera ver un dia en todos los kalendaryos djudios, el 2 Tevet markado no solo komo el ochen dia de Hanuka, ma komo el Dia Internasional de Ladino tambien.  Ansina, todo el ke mira i lo ve, va entender ke el lado sefaradi del patrimonyo djudio es un trezoro ke se deve mantener para siempre.

Ya dimos un paso muy emportante para esto en el Primer Dia Internasional de Ladino, muestra esperansa es ke en los anyos venideros munchas mas komunidades van a adjuntarsen en el 2 Tevet, para fiestar no solo el kavo dia de Hanuka, ma el Ladino I toda la kultura sefaradi atada kon eya.