eSefarad Noticias del Mundo Sefaradi
Ver todos los artículos de esta sección >>
Elza Niyego
El 17 de Augusto, 1927: una data de una gran trajedia en Estambol. Elza Niyego, edad de 22 anyos, fue enkuchiyada i matada en la kaleja «Bankalar Caddesi» de Estambol, serka de su kaza, en kaminando djuntos kon su ermanika Rejin i su prima Rashel Behar. Rejin perkuro a salvarla a la ermana i fue ferida tambien. Es una estorya muy triste ke amostra, en mi opinion, el antisemitismo ke avia pujado en el paiz djuntos kon el nasionalizmo turko, i la dominansa de ombres en la sosiedad turka de akel tiempo.
Ken la mato a Elza, i deke?
El ke mato a Elza se yamava Osman Ratıp ,un ofisier turko ke avia servido el Sultan otomano Abdülhamit II, era 30 anyos mas grande de Elza. Osman se avia enamorado de Elza I kijo kazarse kon eya aun ke era 30 anyos mas grande I ya era kazado. Elza naturlmente lo refuzo. En primero Osman perkuro a sekuestrarla (fuyirla), ma la famiya se kesho a la polisia, i Osman fue arestado I emprezado por un mez. Kuando salyo de prezo, empeso demuevo a molestarla i amenasarla a Elza. Los paryentes de Elza, para salvarla, la espozaron kon un mansevo djudio. Ma ni esto no la salvo. El asasino Osman Ratıp la aferro en la kaye kuando Elza estava aboltando a kaza de su lavoro i la kuchiyo asta la muerte. Kuando la povereta madre de Elza tomo el haber, koryo komo loka al lado de su kriyatura kayida en sangre en la kaye.
El Fueneral komo protesto
Al dia, el 18 augusto, el funeral de Elsa fue asistido por un grande multitud de djentorya. Dozenas de miles de personas estavan en la kaye para akompanyar el tabut ke estava kuvierto de blanko, I yevado por mansevos djudios. Mientres ke la prosesion pasava, la djente echava flores i los otomobiles se travavan a un lado, se kedavan para desharla pasar. El puevlo djudyo de Estambol estava konvensido ke siendo ke la viktima era djudia i el asasino era turko-muslumano de famiya “alta”, el kastigo al asasino no iva ser severo. El funeral se izo komo un protesto i una demonstrasion publika de djudios kontra la indjustisia.
Kuando un tramvay pasando no se kijo kedar para la prosesion funerala, un djudio, Avram Korida, ke vistia su uniforma de soldado turko, kon su bayoneta amenaso al “vatman” (shofor del tramvay) i lo forso a kedarse.
Ma avia i otro otmobil ke no se kedo. Adientro estava el sekretaryo del partido politiko republikano en poder (Cumhuriyet Halk Firkasi) Saffet Bey kon un amigo. Sus otomobil paso por adientro del multitud ke gritava “demandamos djustisa!”. Saffet Bey fue direkto a la polisia i poko despues empeso la “investigasion legala” del funeral de Elza.
Antisemitismo en segita del funeral
Los jurnales publikaron artikolos antisemitikos. El famozo jurnalisto Yunus Nadi amenaso a los djudios en su gazeta Cumhuriyet (Republika) : «Devesh kerer bien el pais, atender a sus leyes, …o irvos de aki.” Un otro jurnal (Milliyet) komuniko ke la demonstrasion del funeral amostro “ke les kayo la maska de los djudios” por sus “ingratitud” desspues de 400 anyos de bivir repozados en la Turkia. Deklarasiones semejantes salyeron de los mas altos niveles del governo. El gran djuez republikano (Nazif Bey) disho: “… los djudios se komportaron kontra las leyes, i tuvieron la ozadia de gritar “demandamos djustisia!” en las kayes i aretar el trafik. Los vamos a kastigarlos de manera mas severa posible.»
Mueve personas fueron arestadas porke tuvieron la “ozadia” de demandar djustisia. Tambien, la polisia kijo arestar Samuel Altabef, el sekretaryo del Gran Rabino. Ma siendo ke Altabef bivia en Evropa desde dos mezes antes, no podia ser akuzado ni mezmo de estar prezente en el funeral de Elza. Topar avukatos para defender a los arestados fue muy difisi, i solo se topo algunos ke achetaron kon prometas de pagar muy altos presyos.
Otras demonstrasiones antisemitikas sigyeron. En Estambol salyo la «prohibision de pasear” kontra los djudios, i los ke estavan en viaje no pudieron tornar al pais por un sierto tiempo. Entre el puevlo sivil tambien uvo aktos kontra djudios. En Edirne piedrearon kazas djudias. En Izmir elevos de eskola rompieron una tabela en ebreo afuera del ospital dhudio de Karatash, i otro grupo demando ke se serren las eskolas i institusiones djudias.
En Izmir uvo koza buena tambien. Una komite kompuesta de avokatos, doktores i merkaders turkos transmetieron sus regretos a los lideres djudios, i mostraron sus apoyo a la komunidad djudia de la sivdad.
En mezmo tiempo una komite de djudios demandaron de tener un enkontro kon Ismet Inonu, entonses el visprezitende de la Republika, i kon Kazim Karabekir, entonses el presidente dela Asemblia Nasionaal. Karabekir aksepto, i en rezultado deklaro ke la komunidad djudia no es responsable por el kondukto de unos kuantos djidios. Ansina paresia ke vino la fin de estos aktos antisemitikos.
Ma no fue ansi. Pishin despues los djudios resivieron una demanda de azer una “donasion” de 50.000 liras para la estatua de Ataturk ke se iva enstalar en Ankara, para “mostrar sus fidelidad” al pais. Ma no kedo kon esto. A kada nada kontinuaron demandas de “donasiones” sin dinguna baza legal. En Izmir, la komunidad djudia fue ovligada de pagar una “donasion” para kuvrir el koste de un otomobil muevo para la polisiya de Izmir.
El kavzo de Jak Pardo i la djustisia turka
Uvo un otro evenimiento enteresante relasionado a Jak Pardo, un djudio ke fue profesor de fransez de İsmet İnönü (ka entonses era el vispresidente de la Republika Turka – i despes fue Presidente.) Pardo eskrivyo una letra a su viejo elevo Inonu rogandole ke libere las 9 personas ke avian sido arestadas ilegalmente. Ma, antes ke esta letra yegara a İnönü, Pardo fue arestado por su “intervension” kon la ley. Kuando Inonu supo de la letra, el mizmo intervino i lo libero a Jak Pardo.
Aparte de Avram Korida, todos los arestados fueron liberados grasias a la intervesnion de los bankeres djudios de Evropa ke deklararon ke no ivan a dar kredito a la Turkia si no los liberavan. Avram Korida, akuzado de ferir al vatman del tramvay (el ke no se keria kedar i dar kamino a la prosesion en el funeral de Elza), resivio 35 dias de kastigo de prezo, ma si komo ya avia pasado 33 dias, salyo afuera dos dias despues. La desizion de “deskulpamiento” fue deklarada el 21 Septembre de 1927, I los djudios deklararon sus kontentes kon la “djustisia turka.”
Rezultado de la trajedia de Elsa Niyego
El djuzgo del asasino de Elza Niyego, Osman Ratıp, yego a la desizion ke su salud mental no era buena i ke va pasar su vida en un hospital psikiátriko. Despues de 10 anyos Osman Ratıp fue matado por un otro rezidente del ospital psikiatriko.
La matansa de Elza Niyego fue de los priemros aktos antisemitos en la Republika Turka, ma fue de los raros ke el puevlo no kedo kayado, I tuvo el koraje de demandar I finalmente ganar djustisia. Ma en mezmo tiempo fueron akodrados varias vezes ke en el pais djudios no podian alevantar sus bozes. Fue el empesijo de la tradision de “kayadez” en la komunidad djudia-turka. I sin kitar boz, a la kayadez, avagar avagar djudios desharon la Turkia. Kuando en 1927, el anyo del krimen de Elza Niyego, avia unos 85 mil djudios en el pais, agora ay solo unos 10-12 mil.
I despues de 94 anyos de su muerte, la tomba de Elza en el semeteryo djudio de Arnavutkoy en Estambol mos akodra de su trajedia…
Ici repose Elsa Niego
14/2/1904-17/8/1927
Toi si jeune, si pure, si bonnei si simple,
Si laborieuse. On t’aimait tant!
Tu n’es plus!
Inconsolables, desolés, nous te pleurons.
Dors en paix ELSA chérie.
Fleur fauchée à peine éclose
(Traduksion)
Aki repoza Elsa Niego
14/2/1904-17/8/1927
Tu, tan djoven, tan pura, tan buena i simple
Tan lavoradora. Te keriamos muncho bien!
Mas no estas aki!
No tenemos konsolasion, estamos tristes, yorando por ti!
Durme en repozo, ELSA kerida.
Flor kortada epenas ke enfloresyo.
(Traduksion adaptada del artikolo de Eli Halegua en: https://www.avlaremoz.com/2017/12/25/elza-niyego-henuz-yeni-acilmisken-bicilmis-cicek-eli-haligua/)
________________________
Rachel Amado Bortnick – Dallas
