En vista de Rachel: La madre del prens Philip en la istoria sefaradi por Rachel Amado-Bortnick

Ver todos los artículos de esta sección >>

Komo ya savemos, el prens Philip, marido de la reyna Elisabeth de Inglitierra, murio el viernes pasado, el 9 de Avril, 2021.  Lo ke no se save bastante es ke su madre, la prinsesa Alice, tiene un lugar onorado en la istoria sefaradi de la Shoa.  En 1994 Alice fue nombrada komo una  “djusta de las nasiones” en Yad Vashem, por aver protejado una famiya djudia en su kaza en Atena (Gresia) durante la Shoa.

Esta sinyora Alice, inyeta de la reyna Viktorya de Inglitierra, era sodra de nasimiento. En el tiempo de la segunda gerra eya morava en Atena Gresia, i ayudava a la Kruz Kolorada para kudiar los refujiados de la gerra. (Su eks-marido era el prens Andrew de Danimarka i Gresia.)  Eya konosia bien a un djudio, Haimaki Cohen, ke fue miembro del parlamento Grego, ma ke se fuyo djuntos kon su famiya al norte del pais kuando los nazistos  okuparon el sud del pais en 1941.  El murio en 1943, i kuando los nazistos vinieron al norte del pais en akel anyo, parte de su famiya se pudo fuyir a Turkia i de ayi al Ejipto, ma la mujer Rachel i la ija Tilde de Haimaki no reusheron a irsen. Kuando supo esto, Alice las tomo a estas dos mujeres  en su palasio, i les dio el sigundo kat (piso)  por sus apartamento.

De siedra a derecha: Tilde Cohen, Alfred Cohen, Haimaki Cohen i Rachel Cohen. Fotografia Evy cohen

De otro lado, Alice tenia dos ijas kazadas kon prenses almanes ke eran ofisieres de la SS.  Kontan ke kuando estos vinyeron a vijitarla en Atena, se sospecharon i le demandaron  ken avia en el kat de ariva. Alice se izo dela sodra ke no sintyo bueno, i disho ke ariva mora su mosa (servidera.) . Alice las vijitava, las kudiava, i asegurava ke tengan todo lo menesterozo i haberes de lo ke se pasava afuera.  En este tiempo, Rachel supo ke uno de sus ijos no pudo yegar a Ejipto.  Alice lo izo trayer i a el a Atena i al lado de su madre i ermana. Los Cohen kedaron en la kaza de la prensesa Alice 13 mezes, asta la fin de la gerra.

En 1990 la famiya Cohen se adreso a Yad Vashem para ke onoren a sus salvadora, la Prensesa Alice, komo Djusta de las Nasiones.  Finalmente en 1994 eya fue ansi nombrada ofisialmente, i su ijo, el prens Philip de Inglitiera, vino a Yerushalayim i avlo sovre su madre.  Disho ke eya nunka les konto de toda la buendad ke estava aziendo en la gerra, ni ke mezmo konosia o ke protejo djudios.  Esto amostra su nobleza de karakter.  Esta venida del prens Philip, fue la primera venida a Israel de un miembro de la famiya real ingleza. En 2018, el prens William, inyeto del prens Philip, vino a Israel en una vijita ofisial, i konosyo a Evy i Filipe Cohen, inyetos de Rachel Cohen.

Kuando a la prensesa Alice, eya fondo asilo para proves en Gresia i se dediko a azer buendades, ma en 1967 la administrasyon militarya de Gresia la arondjo del pais, i se vino a Inglitierra, al palasio Buckingham, ande murio en 1969.  Murio sin un grosh a su nombre porke dava todo lo ke tenia a ayudar a proves i guerfanos.

Eya desho de sava ke keria enterrarse en Israel, en el Monte de Olivas.  I kuando el prens William vino a Israel en 2018, vijito su tumba ayi.

—————-

Rachel Amado Bortnick – Dallas