En vista de Rachel: La identidad sefaradi

Este aze parte de un muevo livro sovre los Sefaradim i Mizrahim en la Amerika, editado por Saba Soomekh («The Sephardi and Mizrahi Jews in America» , Purdue University Press, 2016.)

Dishe «empesi a meldar», porke es oy (viernes) ke lo resivi, i si komo es 30 pajinas de largura, no tengo tiempo de eskaparlo oy.  A la noche, o amanyana lo vo meldar entero, por siguro.  Lo ke vos kero komentar trata del empesijo, ande Devin amostra ke, a la kontra de lo ke munchos eskrivieron,  los sefaradim ke yegaron a la Amerika no se identifikavan komo sefaradim de si para si, ma se ambezaron a asumir esta identidad despues de enkontrar  Ashkenazim aki.

Esto es egzaktamente lo ke le dishe yo la semana pasada en una entrevista.

Konti ke yo kuando vine a la Amerika me konsiderava simplemente djudia, una djudia de Turkia.  I kuando enkontri djudyos ashkenazis kon uzos tan diferentes de los muestros, i lengua (Yidish) ke nunka tenia sentido, i ke no kreyian ke yo podia ser djudia, le eskrivi una letra a mi papa demandandole deke es esto, i komo eksplikarles deke semos djudios aun ke semos muy diferentes de eyos.  Mi papa (ke ya konosia el inglez) me respondio ke les diga ke mozotros semos SEPHARDIC JEWS.  Ansi fue ke me ambezi yo ke mozotros semos sefaradis, i ke eyos son ashkenazis.

Keria saver si otros de vozotros tuvieron una eksperiensa similar ke vos izo asumir el «self-identification» (identifikarse de si para si) komo sefaradi.