eSefarad Noticias del Mundo Sefaradi
Ver todos los artículos de esta sección >>
_________________________________________________________
La grande reushita del 6en DidL en Murcia, Espanya
El 27 de novembre en la universidad de Murcia, Espanya, tuvo lugar el 6en Dia Internasional de Ladino, i pishin resivi el raporto i fotos de muestra muy kerida amiga la profesora Dra. Juana Ruiz Castaño, ke lo organizo oganyo, komo kada anyo del momento ke Zelda Ovadya lo propozo aki en LK.
El raporto de Juana mos aze saver ke oganyo tuvo un enorme “éxito” (reushita), i me adjunto estas fotos ke amostra komo el salon estava yeno. Eya me eskrive (aki en traduksion mia):
“El oditorio de muestra Fakultad, ke es una sala muy grande, se incho de djente, ansi ke avia djente asentada asta las eskaleras i en basho en los pasajes. Fue muy emosionante ver tantos profesores i elevos i djente enteresada kompartiendo esta fiesta por la lengua. La konferensia de Matile i Viviana Rajel fue ekselente i la djente kedaron fasinados.”
No ay nada de kuriozo en esto, porke Matilda i Rajel Barnatan, muestras amigas ke desde 26 anyos aki dirijan la Emision Sefaradi en la radio nasionala de Espanya son muy konosidas, muy savidas, i muy talentuozas.
Rajel tiene talento muzikal, i kanta muy ermozo tambien. Juana me mando el enlase de una entrevista ke izieron el otro dia kon Viviana i Matilde en la radio Onda Regional de Murcia, ande Rajel kanta un poko tambien:
https://www.orm.es/programas/
En una de las fotos vej tambien a Rajel kantando » acapella.”
Es una alegria tomar estos haberes buenos. Munchas felisitasiones a muestras keridas amigas Rajel, Matilde, i Juana.
Rachel Amado Bortnick
Dallas, Texas
Ladinokomunita
______________________________________________________________
En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros sus komentarios sovre distintos butos.
