eSefarad Noticias del Mundo Sefaradi
Ver todos los artículos de esta sección >>
Kreygo ke no ay djudio ke va Olanda i no vijita la antigua sinagoga Portugeza en Amsterdam. Lo ke no se konose muncho es la emportansa de la biblioteka ke esta en este edifisio. Oy vos vo eskrivir un poko sovre esto, bazandome en un otro artikolo ke meldi oy en el jurnal «Times of Israel» Built by conversos fleeing Spain, Amsterdam’s ancient Ets Haim library gets an update
En primero diremos ke ay un chiko yerro en el titolo en inglez, porke los konversos ke fueron a Amsterdam no se fueron de Espanya (a lo menos no direktamente), se fueron ayi de Portugal, i a vezes despues de aver ido de Portugal a Italia, i de ayi a Amsterdam. Ma no emporta. Lo emportante i enteresante es el kontenido del artikolo, i, espesialmente, el kontenido de la biblioteka.
Esta biblioteka kontiene 23.000 livros, i es la mas vieja biblioteka djudia en el mundo. Solo la metad de los livros estan katalogados, i estan bushkando donadores para arekojer un milion de dolares ke tienen menester para kompletar de katalogarlos.
Mas de 200 livros antiguos en esta koleksion son muy raros i no se save si egzisten en otras bibliotekas. El mas viejo livro ke tienen es un manuskrito de Mishneh Tora datado del 1282. Rambam (Maimonides) eskrivyo esta ovra en Ejipto entre 1170 i 1180, ansi ke esto es kopyado por uno en Narbonne, al sud de Fransia. Lo uniko aki (al lado de ser el mas viejo manuskrito de Mishne Tora) es ke amostra la sensura de la iglezia kristiana. La odisea del livro es enteresante i misteriozo. (Komo dize el artikolo «Si solo mos podria avlar!’) En 1555 estava en Italia. Arivo en Olanda en el siglo 19 (ma no se save komo) i se topava en la biblioteka de un rabino de Lahey (Den Haag/ the Hague), el kual lo aregalo a la sinagoga de Amsterdam.
Uno de los projektos inisiados por esta libreria se yama Encyclopedia of Jewish Book Cultures Online ke va sirvir sovre todo a los akademikos.
En la foto del artikolo, aki adjuntado, se ven – de la siedra a la derecha: una oja del Shulhan Aruh, imprimido en Krakovia,1607; primera oja de un livro de Venezia, 1674; una oja del livro Arbaa Turim» de Yaakov Ben Asher.
Mozotros mos akodraremos (esto NO esta en el artikolo) ke Arbaa Turim fue el primer livro emprimido en el Imperio Otomano, en el anyo 1493 en Konstantinopla (Estambol) por la imprimeria de los ermanos Nahmias. (Notar ke esto fue al anyo pishin despues de la eskpulsion de Espanya! ) Es emprotante saver este fakto. (No se ande se topa agora esta edision, ke es mas vieja de la de Amsterdam.)
Saludos a todos,
Rachel
________________________
Rachel Amado Bortnick – Dallas
Ladinokomunita
