En vista de Rachel: Ken era Sabetay Djaen, a.a.?

En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.  
 
 

Ken era Sabetay Djaen, a.a.?

Del 6 al 18 Oktobre, 2010, el grupo de Ladinokomunita tuvo su kuatren enkontro i tur en Espanya, para konoser muestras raises sefaradis en varias sivdades. En el dia mierkoles, el 13 Oktobre, 24 personas estavamos en la sivdad de Jaen, resividos komo reyes i giyados  por muestro amigo Rafael Cámara, presidente de Luventa, asosiasion para promover la erensia de esta chika sivdad.  Estavamos kaminando por las kalejikas estretchas, kon abashadas i suvidas, en la djuderia  (juderia) de Jaen, en Espanya: A mi lado estava muestro amigo Sabetay Sages kuando vide el nombre “Sabetay” en la tabela mostrando el nombre de la kaleja!  Mos riyimos, diziendo ke esto era a onor de el.
 
Ma poko despues, kuando entrimos en un edifisio yamado “Centro Sabetay Djaen” de la Universidad Popular de la sivdad, supimos ke el Sabetay onorado en Jaen era el gran Sefaradi de este nombre, ke merese ser mas konosido de lo ke es.   Aki vos do un poko de enformasion sovre el.
 
Sabetay Djaen (1883-1947) nasyo en Plovdiv, Bulgaria, i era – komo se entiende de su nombre (D’jaen) – desendiente de una famiya djudia ekspulsada de la sivdad de Jaen.  El fue granrabino en Monastir, Argentina, Uruguay, i Rumania, i  tambien un jurnalista, autor,  poeta, i un prolifiko autor de teatro sefaradi.  El eskrivio mas de vente piesas de teatro en djudeoespanyol ke fueron reprezentados en varios paises. El lavoro, djuntos kon el Dr. Ángel Pulido i el eskritor Rafael Cansinos Assens, para ke los Sefaradim sean rekonosidos komo parte de la erensia espanyola.  Tambien lavoro para dar a konoser la kultura espanyola a los sefaradim.   Por esto todo el fue rekonosido kon un premio akordado por el prezidente Niceto Alcalá Zamora de la Segunda Republika espanyola. 

El edifisio a su nombre en Jaen fue dedikado en 2007 por el mayor (“alcalde”) de Jaén Miguel Sánchez de Alcazar.  Prezente estava la Sra. Eliana Djaen, bizinyeta del haham Sabetay Djaen, ke vino para esta okazion de Buenos Aires, Argentina.

I en muestro grupo de Ladinokomunita estava presente Al DeJaen de Seattle, Washington; no de la mizma famiya, ma klaramente desendiente de los orijinarios de Jaen de antes la Ekspulsion tambien.