eSefarad Noticias del Mundo Sefaradi
Ver todos los artículos de esta sección >>
_______________________________________________________
El “Sephardic Adventure Camp” (SAC – Kamping de Aventura Sefaradi) de Seattle es una koza de maraviyar! Las kriyaturas (de 9 a 16 anyos) se embezan istorya, tradisiones, i lengua sefaradi, todo en djugando, gozando de la natura en un lugar de ayre limpio, kon plazer i alegria.
El kamping para kriaturas sefaradis empeso en los anyos de 1950, kon la kolaborasion de las dos kehilot sefaradis de Seattle: Ezra Besarot (de los rodeslis) i Bikur Holim (de los turkanos.) Desde entonses, kada anyo se estuvo engrandesiendo i mijoreando de todos maneras.
Oganyo el SAC es del 1 al 18 de Augusto, 2019, tiene el tema de la eksperiensa Sefaradi en el Imperio Otomano. Kada kabina tiene el nombre de una sivdad sefaradia, komo Salonika, Sarajevo, Rhodes, o Tekirdag (no se si tienen Izmir!) Se estan embezandoles sovre los savyos i lideres sefaradis istorikos i mas muevos. Los nombres de las varias kamaretas i lokales estan eskritas en letras ebreas i latinas. (Por egzemplo “la kuzina”, o “La kehila” o “el kal” para la sinagoga.)
I tambien tienen munchas aktividades para ensenyarles la lengua djudia-espanyola. Kada dia anunsan el “Ladino Word of the Day” (biervo en ladino del dia) ke se aviza en la seremonia de bandiera, i todos lo van uzando i repetando dia entero. Tienen una sesion ande se sirve leche kon kakao, i kon los findjanes en mano sienten al Haham ke les konta kuentos, konsejikas de Djoha, i les ambeza refranes i dichas en ladino. (Estas lo yaman “Coca en la Boca”!) Aparte de esto tienen klasas “interaktivas” de Ladino ande los elevos son motivados de kerer saver i topar mas. Mezmo kuando estan komyendo, deven uzar el djudyo espanyol, dizir kozas komo “dame una kuchara por favor”, dizirel nombre de la komida, i mas, para ke las kriyaturas sepan uzar estas frazas en sus vidas diarias. Aki vos adjunto foto (travado por Brian Kirschen) del poster en la kafeteria, kon la bendision ke dizen las kriyaturas despues de komer.
Siguro ke las komidas son absolutamente kasher. I kada dia i Shabat azen las tefilot apropriadas al stilo turko, i siguro kon repozo en Shabat.
Los elevos de edad mas alta se ambezan tambien sovre la Shoa. Oganyo, siendo ke Tishabeav fue durante el kamping, en estos dias se embezaron sovre la eksperiensa de los Sefaradim en la Shoa, i sintieron a sovrebivientes de Rodes i Salonik, i mezmo de Libya.
Los profesores son siempre personas de alto nivel, sean hahames o maestros de eskola. Oganyo envitaron DOS eruditos sefaradis – Devin Naar (profesor de estudios sefaradis en la Universidad de Washington), i Bryan Kirschen (profesor asistiente (doçent en turko) de linguistika en la Univeridad de Binghamton) – kada uno por tres dias, a ensenyar la lingua sefaradia.
En sus primeros anyos el SAC era para las kriaturas de Seattle. Ma kada anyo se engrandesyo i vinyeron kriaturas de otros lugares. Agora vienen de todas las partes de la Amerika, de Canada, de Israel, i de Espanya. Ke bueno seria si venian tambien de Turkia, Gresia, i mas otros paizes tambien! (Los ke keren tomar mas enformasion ke vaygan al sitio
http://www.sephardicadventurecamp.org/)
En sus vakansas, en embelekandosen i gozando de la ermozura de la natura, de amistad, i de todo bueno, los chikos ke vienen al SAC se estan ambezando a ser sefaradis en el mundo de oy. Oguramos ke esta emportante “aventura” kontinue por munchos munchos anyos mas.
Rachel Amado Bortnick
Dallas, TX
Fuente: BÜLTEN de los turcanos de Israel – turkisrael.org.il
______________________________________________________________
En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros sus komentarios sovre distintos butos.
