EN VISTA DE RACHEL: El 31 Marso – 1492 i 2008 por Rachel Amado-Bortnick

Ayer, el 31 Marso, me akodri del dia malorozo en 1492, kuando el rey Fernando/Ferdinando i la reyna Isabella sinyaron el Edikto de Ekspulsion ke forsava a todos los djudios (aparte de los konvertidos al kristiansimo) a salir de sus reynado por siempre. Es una istorya ke mozotros, los Sefaradis desendientes de estos djudios fieles, konosemos muy bien, ma a vezes mos olvidamos de komemorar este dia. (Yo ya me akodri ayer, ma no tuve tiempo de eskrivir.)

Yo tengo otra razon de akodrarme, i esto tiene ke ver kon la istorya de Ladinokomunita.

Todo empeso en 2006-7 kuando munchos sefaradis de la Amerika Latina, i sovre todo de Argentina, se avian enrejistrado komo miembros de Ladinokomunita. Yo en chika tenia una amigita muy kerida, Alegre Saban,ke morava djusto enfrente de mozotros en Izmir. (Los de Saban moravan “de parte de mar” komo dizimos, i muestra kaza era “de parte de montanya” en la mizma kaleja, paralel a la mar.) Alegra i yo eramos amigas, vizinas, i kamaradas de klasa en la eskola primaria Bene Berit, i tambien en la eskola turka (Inönü ilk okulu.) Ma despues eyos emigraron a Argentina, i otra famiya djudia paso a sus kaza. Mas no tuve haber de eya.

Entonses en 2007 me akodri de Alegre i demandi en LK si ay alguno ke konose o konosyo la famiya Saban de Izmir en Buenos Aires, i di los detalyos ke me akodro de todos de la famiya. I muestra amiga Graciela Tevah de Ryba me respondyo ke su papa i el Sr. Meir Saban eran amigos, etc. I finalmente la topi a mi amiga Alegre, i me komuniki kon eya, i en 2011, kuando izimos el viaje de LK a Argentina, me enkontri en persona kon Alegre djusto 60 anyos despues.

Ma tornaremos a la data de 31 Marso de 2008, una data inovlidable para mi, porke akeya noche yo di la konferensia de la seremonia de komemorar la Expulsion de 1492 en la antika Sinagoga Mayor de Barcelona, Espanya. I komo fue esto?

Despues ke me avia komunikado kon Alegre Saban, mi amigita de chikez, me vino un email de Mario Saban de Barcelona. Mario se dio a konoser komo el ijo de David Saban (el ermaniko de Alegre ke tenia 6-7 anyos kuando se fueron a Argenina, i ke es miembro de LK) diziendome ke el avia muevamente fondado la organizasion Tarbut Sefarad en Espanya, i si podia venir a dar konferensias ayi sovre la kultura sefaradi. Lo azere kurto, mos fuimos yo i mi marido Bernard, i izimos un viaje absolutamente maraviyozo i muy enteresante. En un oto alkilado, Bernard konduizio por miles de kilometros. Avli en 11 sivdades de Espanya ande Tarbut Sefarad tenia reprezentantes. Ma la primera konferensia fue la de la komemorasion del 31 Marso en el kal Mayor, ke egzistia kuando muestros antepasados estavan dainda en Espanya. No vos puedo dizir ke emosion ke fue, i ke emosion i agradesimiento siento dainda kuando me akodro!

Dias buenos a todos,
Rachel Amado Bortnick
Dallas