eSefarad Noticias del Mundo Sefaradi
Ver todos los artículos de esta sección >>
_________________________________________________________________
En Mayo de 1944, los djudios de la isla de Kretia fueron metidos en un vapor de kargo de petrol, el Tanais, para sus kamino a Auschwitz.. Seguro ke el vapor iva ir a Pireos (Piraeus) i i de aya los desdichados ivan irsen a Atena i de aya kon treno a sus muerte. Ma no yegaron ni a Pireos. Los inglezes, pensando ke era un vapor Alman, lo torpilyaron (torpedo), el Tanais se undio, i su kargo de serka 300 almas djudias se desparesyo en la mar. Ansi fue la fin de una komunidad djudia ke egzistio en Kretia por 2300 anyos. Es una trajedia ke fue poko konosida en el mundo, i kaji nunka mensionada en la literatura de la Shoa.
Agora ay una ekspozision en el muzeo djudio de Atena sovre la istoria de esta komunidad, kon objetos de famiyas ke avian deshado la isla antes de la Segunda Gerra Mondiala. Entre los objetos ay un diario de una ijika grega ke konta la despartision kon su amiga i kamarada de klasa djudia ke se fue kon el Tanais.
En 1996 un grupo de djudios gregos (enkavesados por Nikos Stavrulakis, z”l, un amigo mio) se enkargaron de rekonstruir la kehila (sinagoga) Etz Hayim en Hania (sivdad en Kretia ande moravan lo mas de los djudios). Agora la kehila es avierta para orasiones de Shabat i fiestas para todo el ke kere, no solo para los pokos djudios ke vinyeron demuevo a bivir ayi.
El artikolo en inglez sovre la ekspozision https://www.timesofisrael.com/greek-jews-honor-crete-community-drowned-in-entirety-en-route-to-auschwitz konta tambien el embrolio del governo grego en su demanda de reparasiones del governo Alman. Vo lo rekomendo.
Rachel Amado Bortnick
Dallas, TX
Fuente: Ladinokomunita
______________________________________________________________
En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros sus komentarios sovre distintos butos.
