eSefarad Noticias del Mundo Sefaradi
Ver todos los artículos de esta sección >>
En pasadas aviamos diskutido este sujeto, kuando yo eskrivi ke en Izmir no se dizia bar mizva, se dizia kumplimiento de minyan, o por el verbo, kumplir minyan.
Oy en el sitio de la Universidad de Washington (ke komo ya savesh tiene munchos dokumentos enteresantes de muestra kultura) vide un komentaryo, bazado en unartiko del jurnal El Avenir (de Salonik) del anyo 1900 (en letras rashis) ke amostra ke la seremonia de BAar Mizva, asegun la konosemos agora, no era konosida en la komunidad, i mezmo en el artikolo, kuando pasa el termino “bar mizva”, eskriven en parentesis “kumplir minyan”, para ke entiendan los lektores!
El artikolo i los komentaryos estan en:
http://jewishstudies.washington.edu/omeka/exhibits/show/sephardic-life-cycles/bar-mitsva
Ayi podesh sintir (i meldar) una entrevista en ladino – kurta ma muy enteresante ke podesh sintirla (i meldarla) – kon el sinyor Albert Adatto,reskapado de la Shoa, ke kumplio minyan antes de la Segunda Gerra. Ayi amostra ke en 1975 (kuando se enrejistro esto) i el i su interrogador uzan el termino “kumplir minyan” i no “bar mizva.”
BAR MITSVA
(el titolo esta en letras kuadradas, i eskrito komo en ebreo.)
Munchas vezes tenemos dicho ke algunos de nuestros korelijionaryos kompatriotos kedaron de ser djidyos sigun eran sus padres sin ser por esto djidyos ala evropea. Eyos kedaron mankos de una parte i de otra i no saven a[b]solutamente nada de muestra relijion ke eyos ven admirar de los estranyeros. La institusyon del bar mizva (kumplir minyan) tanto espandida entre nuestros korelijyonaryos de otros paizes no fue ainda estabilida entre nozotros i esto es siertamente muy regretavle, sovre todo kuando eya se ve uzada entre los djudyos alemanes de muestra sivdad.
Dia de martes pasado el djoven Si’ [sinyor] Edvin Shteiner, ijo de Si» Manuel Shteiner, inspektor de los shemin de feres oryentales en Saloniko, kumplyo sus 13 anyos i se izo ansi bar mizva. Musyu Shteiner ke entiende sus doveres de padre djidyo, kargo a musyu Kelman de ensenyar a su ijo los doveres relidjyozos de embezarlo a meter tefilin i a dizir las berahot ech’ (ets.) Dia de Shabat musyu Shteiner, sus dos ijos mayores, i el djoven Si’ Edvin Shteiner, estuvieron dizir la orasyon en la kala Emanuel. Eyos suvieron al Sefer Tora segun el uzo i a esta okazyon donaron 10 frankos ala kala un regalo para los haveres i 10 frankos para la asistensya al travajo.
BESIMAN TOV
—————-
Rachel Amado Bortnick – Dallas
Fuente: Ladinokomunita
