EN VISTA DE RACHEL: Arte moderno de la Megila de Purim, i una megila istorika por Rachel Amado-Bortnick

Purim se esta aserkando, aziendomos akodrar de muestras chikezes en este tiempo, djuntos kon sonrizas i savores de dulsurias maraviyozas. Tambien siempre mos agrado la estorya de la ermoza i korajoza reyna Ester ke salvo a los djudios i trusho grande alegria.

Desde los tiempos medievales asta muestros dias la estorya de la megilla de Purim inspiro la kreasion de ovras de arte. No solo ke las megillot mezmas fueron dekoradas, ma pintores famozos komo Rembrandt, Michelangelo, i Botticelli izieron tablos grandes de este sujeto. Tambien livros ilustrados kon esta estorya fueron muy populares, una tradision ke dainda kontinua sin kedar. Entre todos estos, asegun mi, el mas ermozo arte moderno de Purim se topa en el set de livros publikado en 2022 por Lior editions en Fransia (https://www.lioreditions.com/), “El Libro de Esther” (en espanyol) i “Le Livre d’Esther” (en fransez).

Mezmo en echando un ojo al sitio vesh la ermozura de los dezenyos kon kolores briyantes, ovras de la pintora Maeva Rubli ke ilustran los livros. I komo vesh, los dos livros vienen adientro de un kuti ilustrado tambien. Estos livros grandes, de katcha godra i papel de alta kalitad, son lo ke yaman en inglez “coffee table books”, livros ke se mete en la mezika del salon para ke los veyga kada persona ke se asenta ayi. No es menester de meldarlo para apresyar la ovra artistika.

Ma tambien, aparte del arte maraviyozo, estos tienen tekstos muy enteresantes tambien.

El espanyol es la transkripsion de una megila de Salamca (Espanya) del siglo XV, eskrito por un djudio konverso, titulado “Este es el Libro del rey Hasueros”, en una lengua ke se puede yamar el ladino d’altiempo, un romanse mesklado kon biervos ebreos, diferente del ladino ke avlamos, ma muy entendible. El otro livro tiene la traduksion al fransez por Julia /Chardavoine, i tambien la faksimil del teksto orijinal, i un analisis i komentrio (en fransez) del profesor Carlos N. Sainz de la Manza.

Meldi ke se puede merkar un livro solo, o el set de los dos livros. Ma kreygo ke va ser el set ke va kedar por siempre komo un kapo lavoro del editorial Lior, ke es de muestro amigo François Azar.

Buen Purim i buenos anyos a todos.