eSefarad Noticias del Mundo Sefaradi
Ver todos los artículos de esta sección >>
10 anyos de Las Estreyikas d’EStambol
Difisil a kreyer ke oganyo, 2014, es el diezen aniversaryo de Las Estreyikas d’Estambol, el koro de kriaturas fondado i dirijido por Izzet Bana i dedikado a las kantikas djudeoespanyolas.
Asta agora kantaron en este koro 300 kriaturas, ma siguro ke los primeros ke kantaron, en 2004, agora ya tienen unos 20-22 anyos!
Izzet tiene listas de todos los 300 partisipantes, de los konsertes ke dieron i ande se emprezentaron i kere organizar una selebrasion de los 10 anyos en desembre de 2014.
Yo kero enkorajarlo a ke lo aga al deredor del Dia Internasional de Ladino, ke es el 8en dia de Hanuka.
Va ser una maraviya de selebrasion, i un gran privilejio para todos los ke van a poder asistir.
(Todo el ke kere viajar a Turkia, ke lo aga en Desembre, para toparse en esta fiesta.)
Podesh ver videos i fotos de Las Estreyikas d’Estambol en: www.estreyikas.com
en Facebook :
https://www.facebook.com/
i en youtube :
https://www.youtube.com/results?search_query=estreyikas+d%27estambol
Lo felisitamos a Izzet i todos ke tomaron, toman, i tomaran parte en Las Estreyikas d’Estambol, i les oguramos munchos anyos mas de kantar endjuntos.
Rachel Amado Bortnick
Dallas, Texas
Ladinokomunita
En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros sus komentarios sovre distintos butos.
