eSefarad Noticias del Mundo Sefaradi
Karos amigos, munchas vezes mos topamos kon siertos momentos misteriozos ke mos van a akompanyar en toda muestra vida.
De mi manseves en Buenos Aires, de los rekodros entremesklados de unas oras signifikativas, i de los tiempos en ke me espozi, morava en la kaleja Maipu, ke es asta agora un sentro de modernidad i intelektualidad destakado.
Sovresale entremedio de munchos rekodros ke el Destino me izo ser vizina serkana de la kaza de uno de los mas grandes eskritores, i mas de nunka agora, de un mito: Jorge Luis Borges.
Esta serkania de su kaza, me permitio kon el tiempo konoserle i mezmo entrevistarle diversas vezes i tengo eskrito algunas kronikas de este mazal del vizindado i del plazer de partajar i admirar la kreasion del eskritor desde tempranos tiempos, ansi ke devenir grande admiradora i seguidora de su ovra.
En este 24 de Agosto rekodramos los 104 anyos de su nasimiento en Buenos Aires, i siempre me plaze dedikar mis impresiones i rekodros de la eksperiensia serkana i magnifika de aver arrekojido palavras i pensamientos.
La serkania del eskritor ke permete apresiar su djenio i personalidad es esmoviente, ansi komo toda su literatura: una kreasion, un suenyo, una situasion real o imajinaria, ke puede
afitar en una sivdad, seya en kuriozos echos intuidos o vedraderos, arrodeando viejas mitolojias, linguas misteriozas, epikas, lejendarias, reflektos bivos de sus antepazado, o sierta istoria leshana, i siempre una proza poetika i serkana…
En este aniversario este es mi omage, i rekomendo el meldado de su ovra en proza i poezia, dunke es lo mijor por mor de apresiar i entrar a las puertas de una magnifika kreasion.
Munchos bezos
Matilda de Espanya
Fuente: Ladinokomunita
