eSefarad Noticias del Mundo Sefaradi
El 6 de septiembre tuvo lugar el enkontro numero 47 del Salon del Ladino (i kon este enkontro ya «estamos kaminando» en su sinken anyo)…
El Sr. Selim Salti mos relato en kurto sovre el kongreso ke se organizo oganyo, en el mez de Julio, en la Universidad Queen Mary en Londra kon kolaborasion de la Unviersidad de Bar Ilan.
A este kongreso sovre estudios judeoespanyoles vinieron investigadores de varios paises. Este fato demostra el interes espierto ke gana el ladino en sirkolos akademikos tambien.
La Prof. Tamar Alexander mos avlo sovre «kartas-postales de Salonik djudia», i mos mostro una seleksion ermoza de kartas postales imprimidas por editores djudios desde los primeros anyos del siglo pasado.
Esta seleksion es en realidad un testimonio fotografiko eksepsional de la kuala los djudios vian a si mizmos, kualo era sus autoimajen, i ke imajen dezeavan transmeter afuera.
Segun la Prof Alexander, los djudios de Salonik, a lo manko asta la aneksion de la sivdad al Estado nasional grego, la konsideravan komo «sus sivdad». No por nada el porto de la sivdad se serrava en dia de Shabat.
Jeneralmente, no vemos kartas ke deskriven la vida interna de los djudyos, ni el interior de las kazas o de los Kales. De la otra parte vemos ke la forma de vistir no diferia de la mayoria de la vistimienta otomana tradisional. Dunke, los konsumadores no-dudios tambien merkavan estas kartas (afilu kon temas djudios) porke las vian komo kartas-postales de Salonik en jeneral.
En la primera karta-postal se ve el rabino Yaakov Meir, el Gran Rabino de Salonik, kon su vistimienta tradisional brodada kon filos de oro.
En la seguna foto se ve Enver Bey, ke levanta una bandiera en onor de la revolusion de los Djovenes Turkos. Se puede notar las letras ebreas tambien, diziendo en ladino: «Biva la libertad !».
En otra foto vemos un merkader ambulante kon su tabla de merkansia. A la derecha de esta foto aparese un dezenio (desmizeriado a mi gusto) mostrando otros «ofisios» de los djidios de Salonik.
La kuartena karta-postal mos yeva a gostar un pokito de los rikos de la sivdad, komo la famiya de Alatini, ke su kaza aparese en esta foto.
La tresera konferensia en el Salon fue dada por la Sra. Zelda Ovadia ke mos avlo sovre «Los kompozitores djudios de muzika klasika en Turkia».
Fue interesante de ambezar de boka de Zelda sovre una galeria grande de muzikologs djudios en la estoria muzikala de Turkia. La muzika turka es muy rika i yena de variantes, i desde el siklo 15, muchos djudios, a vezes konosidos por el publiko kon sus nombres turkos, desharon su marka en la muzika del imperio otomano.
Fue muy natural ke una grande parte de la konferensia se avlo sovre Los Maftirim i su erensia muzikal, desde las ovras poetikas i muzikalas de Ribi Yisrael Nadjara (1555-1628) asta muestros dias.
Muy emosionante fue oyir dos kantes liturjikos de Los Maftirim, de
la koleksion impresionante editada i kumplida por muestra amiga Karen Gershon de Estambol.
El lavor istoriko de Karen kon el CD de «Zemirot» i el «album» grande kon tekstos i notas muzikalas, 4 CD i un DVD, es un trezoro kultural para todos mozotros, i para las jenerasiones ke mos suseden.
Yehuda Hatsvi
Erets Yisrael
Para Ladinokomunita
