eSefarad Noticias del Mundo Sefaradi
Ofresemos un programa kompleto kon la poesía i la kreasión kontemporánea sefardí. En este viaje keremos ke los oyentes mos akompanyen traverso la poesía, la mar i la nostaljía en la bozes de distintos poetas ke eskriven en muestra lingua. Muestro viaje prinsipia en la mar kon las poesías «La Mar» de Viviana Rajel Barnatán i «La espada n’el agua», de la autoría de Matilda Gini Barnatán. Kontinuamos muestro paseo poétiko entre la natura kon la poesía «I la luvia kaye» de Viviana Rajel Barnatán i la Isla de las Rozas en las palavras ke Matilda Gini Barnatán dedika a «Rodas» la isla grega i tiera de nasimiento de su madre Rebeca. La palavra poétika se torna flor, estreya i pajariko en las poesías eskojidas del autor sefardí búlgaro Izan Konorti «Elegía», «Kuando estreya kae», «Simyenta de flor» i «Una pluma». Ansimezmo la agua mos yeva a lugares lejanos, kompartimos poesía trokada en kante de la pluma de Clarisse Nikoidsky en la boz de Dina Rot «La mar». La múzika sefardí tradisional tambyén se adjunta a este viaje en el afamado kante «Cuando tu madre te parió» en la versión de Joaquín Díaz. Kurunamos el programa kon el kante tradisional sefardí «Abraham Abinu» en la interpretasión de la kantadera sefardí Soledad Bentolila.
«Emisión Sefarad: Kuando la mar se torna viaje en la palavra i la múzika»
________________________________________________
Domingo a las 07.30 horas UTC. Lunes a las 10.04 y 20.00 horas UTC
La «Emisión Sefarad» es un programa kultural de radio, en lingua sefardí o djudeo-espanyol, que se siente kada lunes enverso Oriente Medio i Mediterráneo i los martes enverso América Norte i Sur. Sefarad es uno de los nomvres de Espanya, i el sefardí es una lingua de baza medieval a la ke se adjuntan palavras de los dialektos i linguas de las sivdades onde los sefaradim moravan. Rajel Barnatán, apareja i prezenta las emisiones i sus kontenido por entero: entrevistas, presonajes, folklor i múzika de ancha diversidad, aktividades, tradisiones, literaturas i una lingüístika atada a la kultura ke tyene sus raízes en Espanya. Ansí «Emisión Sefarad» guadra el trezoro poétiko de los S X al XII en uno de los grandes patrimonios kulturales entregados a la umanidad. Ansiemzmo la kreasión kontemporánea arrebive en muestros días i atira el intereso de oyentes de diversos lugares i paízes.
