eSefarad Noticias del Mundo Sefaradi
Vos azemos musafires en la «Kuzina de Emisión Sefarad», kon savuridas rechetas orijinales sefardim i kantes gastronómikos. La tradisión ke pasa de madres a ijas, de Nonas a enyetas se reflekta en la kuzina kon las rechetas ke guadraron las famyias, rikas kumidikas ke ermozean la tradisión partajadas i enrikesidas kon los savores de los paízes onde van a morar los djudiós. Las rechetas ke aparejamos son «Arros kon pyniones, pasas i kanela», kontinuamos kon un mandjar de pasta «Makarón kon kezo i leche al forno», i unotra recheta muy buena ke puede aparejar toda la famyia «Keftes (alvóndigas) de pishkado», akompanyado de kantes i músika «La cena del desposado» (Kante de Bodas sefardí), «Una muchacha en Selanika», kante sefardí de Turquía en la versión de Paco Díez (Boz) i la guitara de Raúl Olivar (CD Esencias de Sefarad). Kurunamos la mesa i el programa kon estos mandjares ke gostamos kon la kolor i savor del kante «Los guisados de las berendjenas» en la interpretasión de Mónica Monasterio. La Kuzina de Emisión Sefarad aresive siempre kon kolores i savores a sus musafires.
________________________________________________
DOMINGOS A LAS 22.30 HORAS, MARTES A LAS 18.30 HORAS UTC.
La «Emisión Sefarad» es un programa kultural de radio, en lingua sefardí o djudeo-espanyol, que se siente kada lunes enverso Oriente Medio i Mediterráneo i los martes enverso América Norte i Sur. Sefarad es uno de los nomvres de Espanya, i el sefardí es una lingua de baza medieval a la ke se adjuntan palavras de los dialektos i linguas de las sivdades onde los sefaradim moravan. Rajel Barnatán, apareja i prezenta las emisiones i sus kontenido por entero: entrevistas, presonajes, folklor i múzika de ancha diversidad, aktividades, tradisiones, literaturas i una lingüístika atada a la kultura ke tyene sus raízes en Espanya. Ansí «Emisión Sefarad» guadra el trezoro poétiko de los S X al XII en uno de los grandes patrimonios kulturales entregados a la umanidad. Ansiemzmo la kreasión kontemporánea arrebive en muestros días i atira el intereso de oyentes de diversos lugares i paízes.
